މަޝްހޫރު މިއުޒިކް ބޭންޑް "ވަން ޑިރެކްޝަން"ގެ މެމްބަރު ލިއަމް ޕޭންގެ މަރާ ގުޅިގެން އޭނާގެ ބައްޕައަށް އަބުރުގެ ދައުވާކޮށްފި އެވެ.

ލިއަމްގެ ބައްޕަ ޖޮއެފް ޕޭންއާ ދެކޮޅަށް އޭނާގެ ގާތް އެކުވެރިއެއް ކަމަށްވާ ރޮޖާ ނޮރެސް ކުރި އެ ދައުވާގައި ބުނެފައިވަނީ ލިއަމްއާ ބެހޭގޮތުން ފާޅުގައި ޖޮއެފް ދެއްކި ވާހަކަތަކުގެ ސަބަބުން ލިއަމްގެ އަބުރަށް ގެއްލުން ވެފައިވާ ކަމަށެވެ.

އެ ދައުވާގައި ރޮޖާ ވަނީ ލިއަމްގެ ބެލެނިވެރިކަމާ ހަވާލުވެގެން ހުރީ ޖޮއެފް ކަމަށް ދޭހަވާ ގޮތަށް އޭނާ ދެއްކި ވާހަކަތައް ދޮގުކޮށް ލިއަމްގެ އެންމެ ފަހު ދުވަސްތަކުގައި ޖޮއެފްގެ އެއްވެސް ހިލަމެއް ނުވާ ކަމަށް ވެސް ބުނެފަ އެވެ.

ފްލޮރިޑާގެ ކޯޓަކަށް ރޮޖާ ހުށައެޅި އެ ދައުވާގައި ލިއަމްގެ އަބުރަށް ލިބުނު ގެއްލުމުގެ ބަދަލުގައި 10 މިލިއަން އެމެރިކާ ޑޮލަރު ހޯދައިދިނުމަށް އެދިފައިވެ އެވެ.

ފާހަގަ ކޮށްލަން ޖެހޭ ކަމަކީ ހުދު ރޮޖާއަކީ ލިއަމްގެ މަރާ ގުޅިގެން ދައުވާ އުފުލިފައިވާ ފަރާތެއް ކަމެވެ. ބުނެވޭ ގޮތުގައި ރޮޖާއަކީ ލިއަމް މަރުވި ދުވަހު އޭނާއާއެކު އުޅުނު މީހެކެވެ.

ލިއަމް މަރުވެފައިވަނީ މިދިޔަ އަހަރުގެ އޮކްޓޯބަރު މަހުގެ 24 ވަނަ ދުވަހު އާޖެންޓީނާގެ ބުއެނޮސް އެއިރެސްގެ ހޮޓަލެއްގެ ބެލްކަނިން ވެއްޓިގެންނެވެ.