ހުޅުމާލޭ އެކި ހިސާބުތަކުން ރޭ ކަރަންޓު ކެނޑުނީ ފަހި ދިރިއުޅުން ކޯޕަރޭޝަނުން ފްލެޓް އަޅާ ސަރަހައްދެއްގައި އެކްސްކަވޭޓަރަކުން ކޮނުމުގެ ތެރޭގައި ތެރޭގައި، ހައި- ވޯލްޓޭޖް ކޭބަލަކަށް ގެއްލުންވެގެން ކަމަށް ސްޓެލްކޯއިން މިއަދު ބުނެފި އެވެ.

ހުޅުމާލޭ ފޭސް 1 އަދި 2 ގެ ބައެއް ސަރަޙައްދުތަކުން ކަރަންޓާއި ފެން ކެންޑުމުގެ މައްސަލަތަކެއް ރޭ ވަނީ ދިމާވެފަ އެވެ.

ހުޅުމާލޭގެ ފޭސް 1 އާއި ފޭސް 2 ގެ ހިޔާ ޓަވަރުތައް ހިމެނޭ ސަރަޙައްދުން ކަރަންޓު ކެނޑުމާ ގުޅިގެން މައްސަަލަ ވަގުތީ ގޮތުން ހައްލުކޮށް އަލުން ކަރަންޓު ދެވުނީ އެތައް ގަޑިއިރެއް ފަހުން، ރޭ ފަތިހު 5 ޖާހަކަން ހާއިރު އެވެ.

ސްޓެލްކޯއިން ބުނީ ކަރަންޓު ކެނޑިފައި ވަނީ ފީޑަރަކަށް ދިމާވި މައްސަލައަކުން ކަމަށެވެ. އަދި މިމައްސަލަ ދިމާވީ ކަރަންޓު ފޯރުކޮށްދޭ ހައި- ވޯލްޓޭޖް ކޭބަލަކަށް ގެއްލުންވުމުން ކަމަށް އެ ކުންފުނިން ބުނެ އެވެ.

ކޭބަލަށް ގެއްލުންވެފައިވަނީ ކޮން ސަރަޙައްދަކުންތޯ ބެލުމަށް ކުރިއަށްގެންދިޔަ މަސައްކަތުން ކަރަންޓު ކެނޑެން މެދުވެރިވީ، ފަހި ދިރިއުޅުން ފްލެޓު މަޝްރޫއުގެ ތެރެއިން ކުރިއަށްދިޔަ މަސައްކަތެއް ކުރުމަށް ކޮނުމުގެ ތެރޭގައި، ހައި- ވޯލްޓޭޖް ކޭބަލަށް ލިބުނު ގެއްލުމަކާ ގުޅިގެން ކަމަށް ސްޓެލްކޯއިން ބުނެ އެވެ.

މިގޮތަށް މައްސަލަ ދިމާވެ ކަރަންޓު ކެނޑުމުގެ ސަބަބުން ރައްޔިތުންނަށް ކުރިމަތިވާ ދަތިތަކުން ދުރުވުމަށް އެކި ސަރަހައްދުތައް ކޮނެގެން ކުރިއަށްގެންދާ މަސައްކަތްކުރާ ހުރިހާ ކުންފުންޏަކުން ވެސް ކަރަންޓު ވިއުގައިގެ ހިމެނޭ ކޭބަލްތައް އަޅާފައިވާ ސަރަޙައްދުތަކުގައި މަސައްކަތް ކުރުމުގައި އިތުރަށް ސަމާލުވުމަށް ސްޓެލްކޯއިން ވަނީ އިލްތިމާސްކޮށްފަ އެވެ.

ހުޅުމާލޭ ފުރަތަމަ ފިޔަވަހީގެ އަދި ދެވަނަ ފިޔަވަހީގެ ބޮޑު ބަޔަކުން ކަރަންޓު ކެނޑިގެން ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ.