ހިއުމަން ރައިޓްސް ކޮމިޝަނުގެ ނައިބު ރައީސްގެ މަގާމަށް އެ ކޮމިޝަނުގެ މެންބަރު މޫމިނާ ވަހީދު އައްޔަން ކުރަން ރައްޔިތުންގެ މަޖިލީހުން ފާސްކޮށްފި އެވެ.

މިއަދު މަޖިލީހުގެ ދައުރުން ބޭއްވި ދެވަނަ ޖަލްސާގައި މޫމިނާ އައްޔަން ކުރަން ފެންނަ ކަމަށް ފާސްކުރީ 67 މެންބަރުންގެ ތާއީދުންނެވެ.

އެޗްއާރްސީއެމްގެ ނައިބު ރައީސްގެ މަގާމު ހުސްވީ އެ މަގާމުގައި ހުރި އަދުހަމް އަބްދުﷲ މިދިޔަ އަހަރު މަގާމުން އިސްތިއުފާ ދެއްވުމުންނެވެ. އަދުހަމް އިސްތިއުފާ ދެއްވީ އެޗްއާރްސީއެމްގެ ނައިބު ރައީސްގެ މަގާމުގައި ހުންނަވައިގެން އޮސްޓްރޭލިޔާއަށް ދިރިއުޅުން ބަދަލުކުރައްވާ އެ ގައުމުގައި 4 މަހު ހުންނެވިފަހުން އެކަން ފަޅާއެރުމުންނެވެ.

ސަރުކާރުން ހުށަހަޅައިގެން މަޖިލީހުން އެޗްއާރްސީއެމްގެ ގާނޫނަށް ގެންނައި ބަދަލާއެކު، އެ ކޮމިޝަނުގެ ރައީސް އާއި ނައިބު ރައީސް އައްޔަން ކުރުމުގެ ބާރު ވަނީ ރައީސުލްޖުމްހޫރިއްޔާ އަށް ދީފަ އެވެ.

މި އިސްލާހާއެކު އެޗްއާރްސީއެމްގެ އިތުރުން އިލެކްޝަންސް ކޮމިޝަނުގެ ރައީސް އާއި ނައިބު ރައީސްގެ މަގާމަށް ވެސް މީހުން އައްޔަން ކުރާނީ ރައީސުލްޖުމްހޫރިއްޔާ އެވެ.