ބޮލީވުޑް އަދި ޓެލީވުޑްގެ ކާމިޔާބު އެކްޓަރު ހީނާ ޚާން އޭނާގެ ކެންސަރު ދަތުރު ބޭނުންކުރީ އާއްމުންގެ ސަމާލުކަން ހޯދަން ކަމަށް ކެންސަރުގެ ސްޓޭޖް 4 ން ސަލާމަތްވި އެކްޓިވިސްޓެއް ކަމަށްވާ ރޯޒްލީން ޚާން ބުނެފި އެވެ.

ދާދި ފަހުން އިންޑިއާގެ މީޑިއާއަކަށް ދިން އިންޓަވިއުއެއްގައި ރޯޒްލީން ވަނީ ކެންސަރުގެ ހަނގުރާމައާ ގުޅޭ ދޮގު މައުލޫމާތު ހީނާ އާއްމުކުރި ކަމަށް ތުހުމަތު ކޮށްފަ އެވެ.

ރޯޒްލީން ބުނީ ހީނާ އޭނާގެ ފަރުވާގެ ވާހަކަތައް ސޯޝަލް މީޑިއާގައި ދައްކަނީ މާ ބޮޑު ކޮށްލައިގެން ކަމަށާއި 15 ގަޑިއިރުގެ ސާޖަރީއަކީ ހަގީގަތެއް ނޫން ކަމަށެވެ.

"އަހަރެން ސްޓޭޖް 4ގައި ހުރިއިރު ވެސް އެ ސާޖަރީއަށް ހޭދަވީ 10 ވަރަކަށް ގަޑިއިރު. އެއީ އަަހަރެންގެ ލިމްފް ނޯޑްސްތައް ނަގަން ޖެހުނީމަ،" ރޯޒްލީން ބުންޏެވެ.

އެހެން ނަމަވެސް ހީނާގެ ހާލަތު އެހާ ގޯސް ނޫން ކަމަށާއި އެހެން ކަމުން މީޑިއާގައި އޭނާ ފަތުރާ ވާހަކަތަކަކީ ގަބޫލު ކުރެވޭ ވާހަކަތަކެއް ނޫން ކަމަށް ރޯޒްލީން ފާހަގަކުރި އެވެ.

އޭގެ އިތުރުން ވެސް ރޯޒްލީން ވަނީ ކެންސަރު ބަލީގައި ހީނާގެ ހާލަތު އެހާ ދަށްވި ކަމަށް ބުނާއިރު ފަރުވާގެ ތެރެއިން ދުނިޔެ ވަށާ ގިނަ ދަތުރުތަކެއް ކުރެވުނީ ކީއްވެގެންތޯ ވެސް ސުވާލު އުފައްދާފަ އެވެ.

ސްޓާ ޕްލަސްގެ ސީރީޒް "ޔޭ ރިޝްތާ ކިޔާ ކެހެލާތާހޭ" އިން އާއްމުންގެ މަގުބޫލުކަން ހޯދި ހީނާ އަންނަނީ އޭނާގެ ކެންސަރު ދަތުރުގެ ވާހަކަތައް ފާޅުގައި ހިއްސާ ކުރަމުންނެވެ.