ބޮލީވުޑްގެ މަޝްހޫރު ލަވަކިޔުންތެރިޔާ އަރިޖީތު ސިންހްއަށް އިންޑިއާގެ ސަރުކާރުން އެގައުމުގެ އާއްމު ރައްޔިތުންނަށް ދޭ އެންމެ ޝަރަފުވެރި އެވޯޑު ކަމަށްވާ ޕަދްމާ ޝްރީ އެވޯޑު ލިބިއްޖެ އެވެ.

އަރިޖީތުއަށް އެ އެވޯޑު ލިބޭކަން ހާމަކޮށްފައިވަނީ އިންޑިއާގެ ޖުމްހޫރީ ދުވަހުގެ މުނާސަބަތުގައި އެގައުމުގެ ސަރުކާރުން ނެރުނު މިއަހަރު ޕަދްމާ އެވޯޑް އަރުވަން ނިންމާފައިވާ މީހުންގެ ލިސްޓުގަ އެވެ.

2011 ވަނަ އަހަރު ނުކުތް ފިލްމު "މާޑާ 2"އިން ބޮލީވުޑްގެ ލަވަކިޔުމުގެ ދާއިރާއަށް ނުކުތް އަރިޖީތު ވަނީ މިދިޔަ 14 އަހަރުގެ ތެރޭގައި އެތައް ހާސް ލަވައެއް ކިޔައިދީފަ އެވެ.

އޭނާގެ ލަވަތަކަށް އާއްމުންގެ ބޮޑު ތަރުހީބެއް ލިބޭއިރު ބޮލީވުޑްގެ އެވޯޑް ޝޯތަކުގައި ވެސް އޭނާގެ ނަމަކީ ވިދުންގަދަ ނަމެކެވެ. އެހެން ކަމުން އޭނާއަކީ މިހާރު ޕްރޮޑިއުސަރުން އެންމެ ބޭނުންވާ ފިރިހެން އަޑެވެ.

ޕަދްމާ އެވޯޑުތަކަކީ އެކި ދާއިރާތަކުން ފާހަގަކޮށްލެވޭ ކާމިޔާބީތައް ހޯދާ އިންޑިއާގެ ރައްޔިތުންނަށް އެގައުމުގެ ސަރުކާރުން އަރުވާ އެވޯޑުތަކެކެވެ. އެ އެވޯޑުތައް ހަތަރު ބަޔަކަށް ބެހިފައިވާއިރު ޕަދްމާޝްރީއަކީ އެންމެ ޝަރަފުވެރި އެވޯޑެވެ.

އަރިޖީތުގެ އިތުރުން މުނިފޫހި ފިލުވުމާއި ކުޅިވަރާއި ތައުލީމު އަދި ސައިންސް ފަދަ ދާއިރާތަކުން މިއަހަރުގެ މިހާތަނަށް 137 ފަރާތަކަށް ޕަދްމާ އެވޯޑު އަރުވާފައިވެ އެވެ.