ރައީސް ޑރ. މުހައްމަދު މުއިއްޒު ދާދިފަހުން ރ. މަޑުއްވަރީއަށް ވަޑައިގަތުމުން އިންސާފު ނުލިބޭ ކަމަށް ބުނެ, އެމަނިކުފާނުގެ ކުރިފުޅުމަތީގައި އިހްތިޖާޖްކުރި މީހާއާ ދެކޮޅަށް ހައި ކޯޓުން މައްސަލަ ނިންމައިފި އެވެ.

ރައީސް މުއިއްޒު އަތޮޅު ތެރެއަށް ކުރައްވާ ދަތުރުފުޅުގެ ތެރެއިން މަޑުއްވަރީއަށް މިދިޔަ ހަފުތާގައި ވަޑައިގަތުމުން އެރަށު ބަނދަރުމަތިން އެމަނިކުފާނު ކުރިފުޅުމައްޗަށް ވަޑައިގެން އަޑު އުފުލީ އެރަށު ސްކޫލުން 2022 ވަނަ އަހަރު ވަކިކުރި މުވައްޒަފެކެވެ. އޭނާ ވަކިކުރީ ޖިންސީ ގޯނާގެ ތުހުމަތެއްގަ އެވެ.

އެ މީހާ ވަޒީފާ އަނބުރާ ހޯދަން ޓްރައިބިއުނަލަށް ހުށަހެޅުމުން އެތަނުން ނިންމާފައިވަނީ އޭނާ ވަކިކުރީ ރަނގަޅަށް ކަމަށެވެ. އަދި އެ މައްސަލަ އޭނާ އޮތީ ހައި ކޯޓުގައި އިސްތިއުނާފްކޮށްފަ އެވެ.

އެ މައްސަލާގައި މިދިޔަ ހަފުތާގައި އެ މީހާ ރައީސްގެ ކުރިފުޅުމަތީގައި އިންސާފު ހޯދަން އަޑުއުފުލުމުން އޭނާގެ ވާހަކަތައް ރައީސް ވަރަށް ރަނގަޅަށް އަޑުއައްސަވަން އިންނެވި އެވެ. ނަމަވެސް ހަމަ އެދުވަހު ހައި ކޯޓުން ވަނީ އެ މީހާ ހުށަހެޅި މައްސަލަ ކުރިއަށް ނުގެންދެވޭނެ ކަމަށް ބުނެ އެ މައްސަލަ ބޭރުކޮށްލައިފަ އެވެ.

ހައި ކޯޓުގެ ހުކުމުގައިވަނީ އެ މީހާ އިސްތިއުނާފްކުރީ އޭނާ ވަކިކުރި މައްސަލާގައި ޓްރައިބިއުނަލުން ނިންމި ނިންމުން ކަމަށާއި ނަމަވެސް އޭނާ ހައި ކޯޓުގައި ފާހަގަކުރާ ކަންކަމަކީ އޭނާ ސަސްޕެންޑްކުރަން ނިންމި ނިންމުމާ ގުޅިގެން ޓްރައިބިއުނަލުން ހުށަހެޅި މައްސަލާގައި ގޮތް ނިމިފައިވާ ކަންތައްތަކެއް ކަމަށެވެ. އަދި ސަސްޕެންޑްކުރި މައްސަލާގައި ނިންމި ނިންމުން އިސްތިއުނާފް ކޮށްފައި ނެތުމުން އެ މައްސަލަ އެގޮތަށް ކުރިއަށް ނުގެންދެވޭނެ ކަމަށް އެ ހުކުމުގައިވެ އެވެ.