އެތައް ބައެއްގެ އަތުން ބޮޑު އަދަދުން ފައިސާ ނަގައިގެން މަސައްކަތް ނުނިންމައި ދިގުދަންމަމުން ގެންދިޔަ ޖާހް އިންވެސްޓްމަންޓްގެ "ދަ ގާޑަންސް" އެއްބަސްވުން ބާތިލުކޮށް އެޗްޑީސީއަށް ނަގަން އަނެއްކާ ވެސް އިންޒާރުގެ ނޯޓިސް ފޮނުވައިފި އެވެ.

ޖައުސާ ޖައުފަރު އީސާ އާދަމްގެ އާއިލާ ހިއްސާވާ ޖާހު އިންވެސްޓްމަންޓް ޕްރައިވެޓް ލިމިޓެޑުން ހުޅުމާލޭގައި 2017 ވަނަ އަހަރު ތަރައްގީކުރަން ފެށި "ދަ ގާޑަންސް" ޕްރޮޖެކްޓް ނިންމުމަށް އެކި ފަހަރު މަތިން އެޗްޑީސީން މުއްދަތު އިތުރުކޮށްދީފައިވެ އެވެ. މިގޮތުން އެ މަޝްރޫއު ނިންމުމަށް 30 ދުވަހުގެ ނޯޓިސްއެއް ޖޫން 6، 2023 ގައި ވެސް އެޗްޑީސީން ފޮނުވި އެވެ. އަދި އެޕާޓްމަންޓްތައް ގަނެފައިވާ މީހުންނަށް ލިބޭ ގެއްލުންތައް ކުޑަކޮށް ވީހާ ވެސް އަވަހަކަށް މަސައްކަތް ނިންމުމަށް އެޗްޑީސީން އެ މަސައްކަތް ކުރުމަށް ނިންމާފައިވާ ކަމަށް ވެސް ޖުލައި 2023 ގައި ބުނެފައިވެ އެވެ.

ނަމަވެސް މިއަދާ ހަމައަށް އައިރުވެސް ޖާހު އިންވެސްޓްމަންޓުން އެ ޕްރޮޖެކްޓް ނިންމާފައި ނުވުމުގެ ސަބަބުން، އެޗްޑީސީއާއި އެ ކުންފުންޏާ ދެމެދު ސޮއިކޮށްފައިވާ އެއްބަސްވުން ބާތިލުކުރުމުގެ އެންމެ ފަހު މަރުހަލާގެ ދަށުން ގާނޫނީ ނޯޓިސް ދިނުމަށް އެޗްޑީސީގެ ބޯޑު ނިންމާފައިވާ ކަމަށް އެ ކުންފުނިން ބުނެ އެވެ. އަދި އެ ނޯޓިސް މިއަދު ފޮނުވާފައިވާ ކަމަށް އެޗްޑީސީން ބުނެ އެވެ.

ޖައުސާ ޖައުފަރު އީސާގެ އާއިލީ ކުންފުނި ޖާހް އިންވެސްޓްމަންޓުން ހުޅުމާލޭގައި ހަދަން ފެށި "ދަ ގާޑެންސް" އެޕާޓްމަންޓެއް. އެތަން ނިންމަން އެތައް މުހުލަތެއް ދިންއިރު ވެސް ނުނިމޭ. ފޮޓޯ: އެޗްޑީސީ

އެޗްޑީސީން ބުނީ އެނޯޓިސްގައި ބަޔާންކުރާ މުއްދަތު ކަމަށްވާ 45 ދުވަހުގެ ތެރޭގައި އެ ޕްރޮޖެކްޓްގެ ނުނިމި ހުރި މަސައްކަތްތައް ނުނިންމާ ހާލަތުގައި، އެއްބަސްވުން ބާތިލުކޮށް އެ ޕްރޮޖެކްޓް ޖާހު އިންވެސްޓްމަންޓްގެ އަތުން ނެގުމަށް ކުންފުނީގެ ބޯޑުން ނިންމާފައިވާ ކަމަށެވެ. އަދި އެ ފިޔަވަޅު އެޅުމަށް ނިންމާފައިވަނީ ޖާހު އިންވެސްޓްމަންޓް ޕްރައިވެޓް ލިމިޓެޑަށް އެޕާޓްމަންޓް ގަތުމަށް ފައިސާ ދައްކާފައިވާ ފަރާތްތަކަށް، ވީ އެންމެ އަވަސް މުއްދަތެއްގައި، އެޕާޓްމަންޓްތައް ހަވާލުކުރެވޭނެ މަގު ފަހި ކުރުމުގެ ބޭނުމުގައި ކަމަށް އެޗްޑީސީން ބުނެ އެވެ.

މި ލަގްޒަރީ ހައުސިން ޕްރޮޖެކްޓްގައި 83 އެޕަރޓްމަންޓް ހިމެނެއެވެ. އެގޮތުން މި ޕްރޮޖެކްޓްގައި ހިމެނެނީ 2 ކޮޓަރިއާއި 3 ކޮޓަރީގެ އެޕާޓްމަންޓްތަކެވެ.