އިންސާނުންނާއި ރޮބޮޓުންނާ ދެމެދު ދުނިޔޭގައި އެންމެ ފުރަތަމަ ހާފް މެރެތަން ދުވުމުގެ ރޭސް ޗައިނާގައި ބާއްވަން އެ ގައުމުން ތައްޔާރުވެއްޖެ އެވެ.

ޗައިނާގެ މީޑިއާތަކުން ބުނާގޮތުގައި އަންނަ އޭޕްރީލް މަހު ބާއްވަން ހަމަޖެހިފައިވާ އެ ރޭހުގައި 12000 އިންސާނުންނާއި އެތައް ސަތޭކަ ހިއުމަނޮއިޑް ރޮބޮޓުން ވާދަ ކުރާނެ އެވެ.

އެގޮތުން މި ރޭހުގައި ވާދަކުރާނެ ރޮބޮޓުންގެ ނަން ހުށައެޅުމަށް ޗައިނާއާއި ދުނިޔޭގެ ރޮބޮޓު އުފައްދާ ކުންފުނިތަކާއި ދިރާސާ އިންސްޓިއުޓްތަކަށް މިހާރު ވަނީ ހުޅުވާލާފަ އެވެ.

ރޭހުގެ ގަވާއިދުތައް ބުނާ ގޮތުގައި މުބާރާތުގައި ބައިވެރިވާ ރޮބޮޓުން ވާންވާނީ އިންސާނުންގެ ހަށިގަނޑާ އެއްވައްތަރު ހަށިގަނޑެއް ލިބިފައިވާ ފައިގައި ފުރޮޅު ހަރުކޮށްފައިނުވާ ރޮބޮޓުންނަށެވެ. ރޮބޮޓުންގެ އިސްކޮޅު ދެ މީޓަރަށްވުރެ ދިގުވެގެން ނުވާނެ ކަމަށް ވެސް ގަވާއިދުގައި ބުނެ އެވެ.

ޖުމްލަ 21 ކިލޯމީޓަރު ދިގު އެ ދުވުމުގެ ރޭސް އެންމެ ފުރަތަމަ ނިންމާ ތިން ފަރާތަކަށް އިނާމު ދޭން ހަމަޖެހިފައިވާ ކަމަށް ޗައިނާގެ މީޑިއާތަކުން ބުނެ އެވެ.

އާޓިފިޝަލް އިންޓެލިޖެންސްއާއި ޓެކްނޮލޮޖީ ކުރިއަރަމުން އަންނަ މި ޒަމާނުގައި ރޮބޮޓުން އިންސާނުންނާ އެއްހަމައެއްގައި ދުނިޔޭގައި އުޅޭނެ ކަމަށް މާހިރުން ލަފާކުރެ އެވެ.