ބޮލީވުޑްގެ މަޝްހޫރު ތަރި ސަލްމާން ޚާންއަށް ވައްބަހުން ޖަހާފައި ނުވާނެ ކަމަށް އެ ދާއިރާގެ އެހެން އެކްޓަރެއް ކަމަށްވާ ޝާހިދު ކަޕޫރު ބުނެފި އެވެ.

ޝާހިދު ސަލްމާންއަށް އަމާޒުކޮށް "ވައްބަހުން" ޖެހި ކަމަށް އަޑު އަރާފައިވަނީ ދާދި ފަހުން ބޭއްވި އިވެންޓެއްގައި އޭނާ ދެއްކި ވާހަކައަކާ ގުޅިގެންނެވެ.

އެ އިވެންޓުގައި ވާހަކަ ދައްކަމުން ޝާހިދު ބުނެފައިވަނީ ބޮލީވުޑްގެ ބައެއް އެކްޓަރުންނަކީ ވަރަށް ކިބުރުވެރި ބައެއް ކަމަށް ބުނެފަ އެވެ. ވަކި އެކްޓަރެއްގެ ނަން އޭނާ ހާމަ ނުކުރި ނަމަވެސް އާއްމުން ގަބޫލުކުރީ އޭނާ އިޝާރާތްކުރީ ސަލްމާންއަށް ކަމަށެވެ.

އެއާއެކު ޝާހިދުއާ ދެކޮޅަށް ސޯޝަލް މީޑިއާގައި ގިނަ ބަޔަކު ޝުއޫރު ފާޅުކުރަން ފެށި އެވެ. އެއާއެކު އެ ދެމީހުން އަޅާކިޔައި ޝާހިދުއަށް ފާޑުކިޔަން ވެސް ފެށި އެވެ.

ކަންތައްތައް ބޮއްސުން ލައިގެން ދާން ފެށުމުން ޝާހިދު ވަނީ އޭނާ ބުނި ބުނުމުގެ މާނަ އާއްމުން ނެގީ އެންމެ ރަނގަޅު ގޮތަކަށް ނޫން ކަމަށާއި އޭނާއަށްވުރެ ސީނިއާ އެކްޓަރަކަށް ވައްބަހުން ނުޖަހާނެ ކަމަށެވެ.

"އަހަންނަށް އަޑު އިވުނު ތިހަކަލަ ވާހަކަތަކެއް. އެކަމަކު ހަގީގަތުގައި އެފަދަ ހިޔާލެއް އަހަރެންގެ ހިތަކަށް ވެސް ނާދޭ" އޭނާއާ ބެހޭގޮތުން ދެކެވޭ ވާހަކަތަކާ ބެހޭގޮތުން ސުވާލު ކުރުމުން ޝާހިދު ބުންޏެވެ.

ޝާހިދު މިވަގުތު މަސައްކަތް ކުރަމުން އަންނަނީ އޭނާގެ ކުރިއަށް އޮތް އެކްޝަން ތުރިލާ ފިލްމު "ދޭވާ"ގެ ޕްރޮމޯޝަނަލް ހަރަކާތްތަކުގަ އެވެ.