ފުވައްމުލަކުގައި ހުންނަ ފެން ޕްލާންޓްގައި މައްސަލަ ދިމާވެ ކޮންމެ ރެއަކު ފެނުގެ ޕްރެޝަރު ދަށްކުރަން ފަށައިފި އެވެ.

ފެނަކަ ކޯޕަރޭޝަނުން ނެރުނު ނޯޓިސްއެއްގައި ވަނީ ފެން ޕްލާންޓުން ފެން އުފެއްދޭ މިންވަރަށް ވުރެ ރަށުގައި ރަށުގައި ފެން ބޭނުންކުރާ މިންވަރު އިތުރުވެފައި ވާތީ ފެން ހުސްނުވެ ފެނުގެ ހިދުމަތް ދިނުމަށްޓަކައި މިރޭ 1:00 އިން 4:00އަށް ފެނުގެ ޕްރެޝަރު ދަށް ކުރެވޭނެ ކަމަށެވެ.

ޕްރެޝަރު ދަށްކުރުމުން ރައްޔިތުންނަށް ދިމާވެދާނެ ދަތިތަކަށް އެ ކުންފުނިން ވަނީ މައާފަށް އެދިފަ އެވެ.

ފަހަކަށް އައިން ކޮންމެ ރެއަކު ފެނުގެ ޕްރެޝަރު ދަށްކުރުމުން އެރަށުގެ ރައްޔިތުންނަށް ދަތިތަކަކާ ކުރިމަތިލާންޖެހެ އެވެ. އެކަމާ ގުޅިގެން އެ ރަށުގެ ރައްޔިތުން އަންނަނީ ކަންބޮޑުވުންފާޅު ކުރަމުންނެވެ.

"ދެ ހަފްތާއަށް ވުރެ ގިނަ ދުވަސްޖެ މިގޮތަށް ފެނުގެ ޕްރެޝަރު ދަށްކުރާތާ. ބޭނުންވާ ވަރަށް ފެނެއް ނުލިބޭ މިއީތޯ އަޅުގަނޑުމެންނަށް ހައްގު މިންވަރަކީ،" އެ ރަށުން ވާހަކަ ދެއްކި މީހަކު ބުންޏެވެ. "މި ރޯދަމަހު ދަމު ނަމާދަށް ދާން ތައްޔާރުވާ ގަޑީގައި ގިނަ ގޭގެއަށް ފެެނެއް ނުލިބޭ ދަންވަރު ޕްރެޝަރު ދަށްކުރާތީ."

ފެނަކައިގެ އޮފިޝަލަކު ނަން ނުޖެހުމަށް އެދި "ހުރިހާ"އަށް ވިދާޅުވީ އެ މައްސަލަ ހައްލުކުރުމަށްޓަކައި މަސައްކަތެއް ނުކުރާ ކަމަށެވެ. އެ މައްސަލަ ހައްލުކުރުމަށް މާލެއިން ސްޕެއާ ޕާޓްސް ގެނެސްގެން ވެސް ހައްލެއް ނުވި ކަމަށް އޮފިޝަލް ވިދާޅުވި އެވެ.

"މާލެއިން ސްޕެއާ ގެނެސްގެން ވެސް ހައްލުނުވީމަ އިތުރު މަސައްކަތެއް ނުކުރެވޭ. އަސްލުމިވާގޮތަކީ އިންޖީނުގެގޭގައި ވެސް ނެތް ކެޕޭސިޓީއެއް، ރައްޔިތުން ފެން ޕްލާންޓަށް ބޭނުންވާ ވަރަށް ކަރަންޓް ދޭކަށް،" ފެނަކައިގެ އޮފިޝަލް ވިދާޅުވި އެވެ.

އޭނާ ވިދާޅުވީ ފުވައްމުލަކު ޕްލާންޓަށް ދިމާވެފައިވާ މައްސަލަ ހައްލުކުރުމަށް ގިނަ ދުވަސްތަކެއް އަދިވެސް ހޭދަވާނެ ކަމަށެވެ.

"ކުންފުނީގެ ހާލަތު ހުރިގޮތުން މިރަށުގެ ކަންކަމަށް އެއްވެސް ސަމާލުކަމެއް ނުދޭ. އެހެން ނަމަ މިކަން މިހާރު އޮންނާނީ ހަައްލުވެފައި،" އެ އޮފިޝަލް ވިދާޅުވި އެވެ.