ކޮވިޑް ނަމްބަރު މައްޗަށް ދާތީ މިދިޔަ ޖެނުއަރީ 27 ވަނަ ދުވަހުން ފެށިގެން އިއުލާންކުރި ކާފިއު މިއަދު އުވާލައިފި އެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ޑިރެކްޓަރު ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ސޮއިކުރައްވާ ނެރުނު އެންގުމުގައި ވަނީ 27 ވަނަ ދުވަހުގެ ރެއިން ފެށިގެން މާލެ، ހުޅުމާލެ އަދި ވިލިމާލޭގައި ރޭގަނޑު 12 އިން ފެށިގެން ފަތިހު ހަތަރަކަށް އެއްގަމު އުޅަނދުފަހަރު ދުއްވުމާއި މަގުމައްޗާއި އާންމު ތަންތަނަަށް ނިކުމެ އުޅުން މަނާކޮށްފައިވާ ކަމަށެވެ. ނަމަވެސް މާޗް މަހުގެ ފަސްވަނަ ދުވަހުން ފެށިގެން ފިޔަވަޅުތައް ވަރުގަދަކޮށް ރޭގަނޑު 11:00 ފެށިގެން ފަތިހު 4:30 ގެ ނިޔަލަށް ބޭރަށް ނުކުތުން މަނާކުރި އެވެ.

ކޮވިޑް-19 އާ ގުޅިގެން މާލެ ސަރަހައްދުގައި ސަރަހައްދުގައި އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް ނުކުތުން މަނާކޮށް އިއުލާންކުރި ކާފިއު އުވާލީ ޑިސެމްބަރު 17ގަ އެވެ.

ނަމަވެސް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ މިއަދު ކޮވިޑް- 19 އާ ގުޅިގެން އަޅާފައިވަ ފިޔަވަޅުތަކަށް ލުއި ދީފަ އެވެ. އެގޮތުން މިއަދު އާންމުކުރި އެންގުމުގައި ބުނެފައި ވަނީ ރޭގަނޑު 11:00 އިން ފެށިގެން ފަތިހު 4:30 އަށް، މަގުމައްޗާއި އާންމު ތަންތަނަށް މީހުން ނުކުތުން މާނާކުރި ކުރުން ބާތިލުކޮށްފައިވާ ކަމަށެވެ.

ކާފިއު އުވާލުމުގެ އިތުރުން ހެލްތް ޕްރޮޓެކްޝަން އެޖެންސީން ކަނޑައަޅައިފައިވާ ގައިޑްލައިންތަކާ އެއްގޮތަށް، ސިނަމާތަކާއި ފިލްމު ތިއޭޓަރުތައް ހުޅުވުމުގެ ހުއްދަ ވެސް މިއަދު ވަނީ ދީފަ އެވެ.

އޭގެ އިތުރުން ގައިޑްލައިންތަކާ އެއްގޮތަށް، ކާބޯތަކެތީގެ ހިދުމަތް ދޭ ތަންތަން، އެކަމާ ގުޅޭ އިދާރާތަކުން ކަނޑައަޅާ ގޮތެއްގެ މަތީން ހުޅުވުގެ ހުއްދަ އާއި ދުވުމަށް ހާއްސަކޮށްފައިވާ ޓްރެކްތައް ވެސް ވަނީ ހުޅުވާލައިފަ އެވެ.

ރައްކާތެރިކަމުގެ ފިޔަވަޅުތަކާއެކު ޔުނިވާސިޓީތަކާއި ކޮލެޖުތަކަށް ދަރިވަރުން ހާޒިރުވެގެން ކުލާސްތައް ކުރިއަށް ގެންދަން ވެސް ވަނީ ހުޅުވާލައިފަ އެވެ.

އެޗްޕީއޭގެ ގައިޑްލައިންތަކާ އެއްގޮތަށް ޖިމްތަކުގައި ކަސްރަތު ކުލާސްތައް ކުރިއަށް ގެންދިއުމަށާއި ޑޭ ކެއާތައް ހުޅުވާލުމަށާއި، މިނިސްޓްރީ އޮފް އެޑިއުކޭޝަނުން ކަނޑައަޅާ ގޮތެއްގެ މަތީން، ރައްކާތެރިކަމުގެ ފިޔަވަޅުތަކާއެކު ޕްރީސްކޫލް ތަކާއި، ނާސާރީތަކުގައި ކިޔަވައިދިނުން ހުޅުވާލަން ވެސް މިއަދު ވަނީ ހުއްދަ ދީފަ އެވެ.

ލުއިތައް ދިންނަމަވެސް، އެއްފަހަރާ ފަސް މީހުންނަށް ވުރެ ގިނައިން މަގުމައްޗަށް އެއްވެ އުޅުމާއި އެކަނި ކުރާ ކަސްރަތުތައް ފިޔަވައި، ކުޅިވަރުގެ ހަރަކާތްތަކާއި ކަސްރަތުގެ ހަރަކާތްތައް ހުއްޓައިލުމަށް އެންގި އެންގުން ވަނީ ދަމަހައްޓައިފަ އެވެ.

އޭގެ އިތުރުން މާލެ ސަރަހައްދުގައި ޕާޓީތަކާއި، ހަފްލާތަކާއި، ރަސްމިއްޔާތުތައް ބޭއްވުން ހުއްޓައިލުމަށް އެންގި އެންގުން ދަމަހައްޓައި މާލެ ސަރަހައްދުން ރާއްޖޭގެ އެހެން ރަށްރަށަށް ދަތުރުކުރާ ފަރާތްތައް ކަރަންޓީނު ކުރާނެ އެވެ.

އެޗްޕީއޭއިން މާލެ ސަރަހައްދުގެ ކާފިއު އުވާލިއިރު މިހާރު ބޮޑަށް ކޮވިޑް ފެތުރެމުންދަނީ އަތޮޅުތެރޭގަ އެވެ.