މާލޭ ރައްޔިތުންގެ މައްޗަށް އެމްޑީޕީއިން އަލުން ކާމިޔާބު ހޯދައި ޕާޓީގެ ވިސްނުން އަލުން ރޭވުންތެރިކުރަން ގޮވާލައި އެމްޑީޕީގެ ފަރާތުން މާލޭގެ މޭޔަރުކަމަށް ވާދަކުރައްވައި ބަލިވި އަނަސް އަބްދުއްސައްތާރު ވިދާޅުވެއްޖެ އެވެ.

އަނަސް އާ ވާދަކުރެއްވިި ޕީޕީއެމް ކެންޑިޑޭޓް ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ކާމިޔާބު ހޯއްދެއްވީ 60 ޕަސެންޓަށް ވުރެ ބޮޑު އަގުލަބިއްޔަތުންނެވެ.

ޑރ. މުއިއްޒު އިންތިހާބު ކާމިޔާބުވިކަން އިއުލާންކޮށް ނޫސްވެރިންގެ ބައްދަލުވެއް ބާއްވައި އެ ބައްދަލުވުން ނިމުނުތަނާހެން އަނަސް ކުރެއްވި ޓުވީޓެއްގައި ވިދާޅުވީ، މާލޭ ރައްޔިތުން ބަސް އިއްވައިފި ކަމަށެވެ. އަދި ވަނީ ޑރ. މުއިއްޒުއަށް މަރުހަބާ ދަންނަވާފަ އެވެ.

"މާލޭގެ ރައްޔިތުން ބަސް ބުނެފި، އަޅުގަނޑު އިންތިހާބުގެ ނަތީޖާ ގަބޫލުކުރަން، ޑރ. މުއިއްޒުއަށް ހޯއްދެވި ކާމިޔާބަށް މަރުހަބާ ދަންނަވަން، މިރޭގެ ނާތީޖާއަށް އެމްޑީޕީއިން ބަލައި ކަންކަން އިސްލާހުކުރަން ޖެހޭ، މާލޭ ރައްޔިތުންގެ މައްޗަށް އެމްޑީޕީ އަލުން ކާމިޔާބު ހޯދާނެ،" އަނަސް ވިދާޅުވި އެވެ.

ކައުންސިލް އިންތިހާބުގައި މާލެއިން އެމްޑީޕީއަށް ނާކާމިޔާބީއަށް ކުރިމަތިލާން ޖެހުނުއިރު އަނަސް އެމްޑީޕީގެ ސެކްރެޓަރީ ޖެނެރަލްގެ މަގާމުގައި ހުންނަވައިގެން ވަނީ ރިޔާސީ އިންތިހާބާއި މަޖިލިސް އިންތިހާބު ވެސް އެމްޑީޕީއަށް ކާމިޔާބުކޮށްދެއްވާފަ އެވެ.