އިންތިހާބާ ބެހޭ މައި މަރުކަޒު ނުވަތަ ބާ ޖަމާލުއްދީން މިއަދު ވަޑައިގަތް ރައްޔިތުންގެ މަޖިލީހުގެ ރައީސް، ކުރީގެ ރައީސް މުހައްމަދު ނަޝީދު ހިމާޔަތްކުރަން ފުލުހުން ވަނީ ހާލަތާ ނުބައްދަލު ބާރުގެ ބޭނުންކޮށްފައި ކަމަށް އިދިކޮޅު ޕީޕީއެމް/ޕީއެންސީން ބުނެފި އެވެ.

އިދިކޮޅު ޕީޕީއެމް/ޕީއެންސީ ކޯލިޝަން ހިންގުވާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ، ޕީޕީއެމް އާއި ޕީއެންސީގެ ލީޑަޝިޕުން ބާ ޖަމާލުއްދީނަށް ވަޑައިގަތީ މީގެ ކުރިން ބޭއްވި ރިޔާސީ އިންތިހާބާއި މަޖިލިސް އިންތިހާބު ނުފޫޒު ފޯރުވައިގެން އެމްޑީޕީން ކާމިޔާބު ކުރުމުން މި ފަހަރުު އެހެން ވިޔަ ނުދޭން ކަމަށެވެ.

އަބްދުއްރަހީމް އިތުރަށް ވިދާޅުވީ، އިދިކޮޅު ލިޑަޝިޕުން ބާ ޖަމާލުއްދީންއަށް ވަަޑައިގެން އެއްވެސް ކަހަލަ ހަމަނުޖެހުމެއް ނުހިންގަވާ ތިއްބެވީ ވޯޓު އަލުން ގުނާ މަންޒަރު ބަލަން ކަމަށެވެ. އެހެން ތިއްބާ ވަޑައިގަތީ ނަޝީދު ކަމަށެވެ.

ނަޝީދު ބާ ޖަމާލުއްދީންގެ ގޯތި ތެރެއަށް ވަދެވަޑައިގެން މަސައްކަތް ކުރެއްވަމުން ގެންދިޔައީ ތަނުގެ މަސްލަހަތު ނަގާލަން ކަމަށެވެ. އަދި އެކަން ކުރުމުގެ ތެރެއިން އެމްޑީޕީގެ އެހެން ބައެއް އިސް ބޭފުޅުންނަށް ގުޅުއްވައި އެތަނަށް ހާޒިރުވާން އެންގެވި ކަމަށެވެ.

ބާ ޖަމާލުއްދީންގައި އިދިކޮޅު ކޯލިޝަންގެ ސަޕޯޓަރުން ވެސް ތިބުމުން، ނަޝީދު އެތަނަށް ވަޑައިގެން މަސްލަހަތު ނަގާލާތީ ސަޕޯޓަރުން ދިޔައީ ނަޝީދު އެތަނުން ބޭރު ކުރަން ކަމަށެވެ. ނަމަވެސް ފުލުހުން ހާލަތާ ނުބައްދަލު ބާރުގެ ބޭނުން ކުރައްވައި ނަޝީދު ހިމާޔަތް ކުރައްވައި އެ ތަނުން ގެންދިޔަ ކަމަށް އޭނާ ވިދާޅުވި އެވެ.

"އަޅުގަނޑުމެންނަށް ފެނުނީ މި ރޯދަ މަހު ދުވާލު މީހުންގެ ގަޔަށް ޕެޕާ ސްޕްރޭ ޖެހިތަން. އެހެން ގޮތަކަށް ބުނާނަމަ ހާލަތާ އެކަށީގެންވާ ވަރަށް ވުރެ ބޮޑަށް ބާރުގެ ބޭނުން ކުރިތަން،" އަބްދުއްރަހީމް ވިދާޅުވި އެވެ.

ނޫސްވެރިންގެ ބައްދަލުވުމުގައި އަބްދުއްރަހީމް އިތުރަށް ވިދާޅުވީ، ބާ ޖަމާލުއްދީންއަށް ރައްޔިތުންގެ މަޖިލީހުގެ ރައީސްގެ ހައިސިއްޔަތުން އަދި ކުރީގެ ރައީސެއްގެ ހައިސިއްޔަތުން ވެސް ނަޝީދަށް ނުވަދެވޭނެ ކަމަށެވެ. އެ މަނިކުފާނަށް ވަދެވޭނީ އެމްޑީޕީގެ ރައީސްގެ ހައިސިއްޔަތުން ކަމަށް އަބްދުއްރަހީމް ވިދާޅުވި އެވެ.

އޭނާ ވިދާޅުވީ ޕާޓީތަކުގެ ރައީސުންނަށް އިލެކްޝަން ކޮމިޝަން (އީސީ)އިން ފާހެއް ދޫކުރާ ކަމަށާއި ނަޝީދު ބާ ޖަމާލުއްދީންއަށް ވަޑައިގަތީ އެކާޑާ ނުލައި ކަމަށެވެ.

މީގެ އިތުރުން އޭނާ ވިދާޅުވީ، ޕީޕީއެމް އާއި ޕީއެންސީއިން ދަނީ ކައުންސިލް އިންތިހާބުގެ ކަންތައް ވަރަށް ކައިރިން މޮނިޓާ ކުރަމުން ކަމަށެވެ. ކޯލިޝަންގެ ސަޕޯޓަރުންނާއި ކެންޑިޑޭޓުން ހައްގުތަށް ރައްކާތެރި ކޮށްދޭނެ ކަމަށް ވެސް އަބްދުއްރަހީމް ވަނީ ވިދާޅުވެފަ އެވެ.