ބޮލީވުޑްގެ ކާމިޔާބު ތަރި ސަލްމާން ޚާން ހިމަނައިގެން ފިލްމެއް އުފެއްދުމަކީ އުނދަގޫ ކަމެއް ކަމަށް އޭނާއާއެކު ގިނަ މަސައްކަތްތަކެއް ކޮށްފައިވާ ޑައިރެކްޓަރު ސޫރަޖް ބަރްޖާޓްޔާ ބުނެފި އެވެ.

ސޫރަޖް ބުނެފައިވަނީ ސަލްމާންއަށް އާ ކެރެކްޓަރުތަކާއި ތަފާތު ރޯލުތައް ދިނުމަކީ ވަރަށް އުނދަގޫ ކަމެއް ކަމަށާއި އެކަމުގެ ސަބަބުން އޭނާއާއެކު މަސައްކަތް ނުކުރެވޭ ކަމަށެވެ.

އެގޮތުން ސަލްމާންއާއެކު އެކްޝަން ފިލްމެއް ކުރިއަށް ގެންދަން ވިސްނި ނަމަވެސް އޭނާއަށް ރަނގަޅު ކެރެކްޓަރެއް ނުލިބުމުން އެ ޕްރޮޖެކްޓް ދޫކޮށްލީ ކަމަށް ސޫރަޖް ބުންޏެވެ.

"ބައެއް ޕްރޮޖެކްޓްތައް ހުރޭ އޭގެ ވާހަކައާއި އެކްޓަރުގެ އެކްޓިންއާ ނުގުޅުމުގެ ސަބަބުން ކުރިއަށް ނުގެންދެވޭ ޕްރޮޖެކްޓްތައް ވެސް" ސޫރަޖް ބުންޏެވެ.

ބޮލީވުޑްގައި 30 އަހަރު ހޭދަކުރިއިރު ސަލްމާން ވަނީ ވަރަށް ގިނަ ޑައިރެކްޓަރުންނާއެކު މަސައްކަތްކޮށް އޭގެ ތެރެއިން ގިނަ ފިލްމުތަކެއް ކާމިޔާބު ވެސް ކޮށްފަ އެވެ.

އެގޮތުން ސޫރަޖްއާއެކު އޭނާ މަސައްކަތްކުރި ފިލްމުތަކުގެ ތެރޭގައި "މެއިނޭ ޕްޔާރު ކިޔާ - 1989"، "ހަމް އާޕްކޭ ހޭ ކޯން - 1994" އަދި "ހަމް ސާތު ސާތު ހޭ - 1999" ހިމެނެ އެވެ.