ކާމިޔާބު ގިނަ ފިލްމުތަކެއް ޑައިރެކްޓް ކޮށްދީފައިވާ ބޮލީވުޑްގެ މަޝްހޫރު ޑައިރެކްޓަރު ފަރާ ޚާންގެ މުޅިން އާ ޓެލެންޓް ޝޯއެއް އިއުލާން ކޮށްފި އެވެ.

"އާންޓީ ކިސްކޯ ބޯލާ"ގެ ނަމުގައި ފަރާގެ ޔޫޓިއުބް ޗެނަލްގައި ރިލީޒްކުރާ އެ ޓެލެންޓް ޝޯއަކީ ހުރިހާ އުމުރެއްގެ އަންހެނުންގެ ތަފާތު ހުނަރުތައް ދައްކާލަން ހާއްސަ ކޮށްފައިވާ ޝޯ އެކެވެ.

އިންސްޓަގްރާމް މެދުވެރިކޮށް ފަރާ އެ ޝޯގެ އިއުލާން ކޮށްފައިވާއިރު އޭނާއާއެކު ޝޯގެ ޖަޖުންގެ ގޮތުގައި ދެން ފެނުނީ އޭނާގެ ކޮއްކޮ ސާޖިދު ޚާންއާއި އެކްޓަރު ގޯވިންދާގެ އަންހެނުން ސުނީތާ އަހޫޖާ އެވެ.

ހަބަރުތައް ބުނާ ގޮތުގައި އެ ޝޯގެ ޖަޖުންގެ ގޮތުގައި ކޮންމެ ހަފްތާއަކު ވެސް ފެނިގެންދާނީ ބޮލީވުޑްގައި ނަން މަޝްހޫރު ތަފާތު ފަންނާނުންނެވެ.

އެ ޓީޒާގައި ފަރާ ބުނީ ހުނަރަކީ ވަކި އުމުރަކަށް އޮންނަ ކަމެއް ނޫން ކަމަށާއި އުމުރަށް ނުބަލައި މީހުންގެ ހުނަރަށް ސާބަސް ދޭންޖެހޭ ކަމަށެވެ.

އެގޮތުން އެ ޝޯގެ ތެރެއިން އާއްމުން ހައިރާން ކޮށްލާނެ ފަދަ ތަފާތު އެކި ހުނަރުތައް އަންހެނުންގެ ފަރާތުން ފެނިގެންދާނެ ކަމަށް ފަރާ ބުންޏެވެ.