ނޫސްވެރިންނަކީ އިސްލާމްދީނުގެ އަސްލުތަކާ ހިލާފު ވާހަކަ ދައްކާފައިވާ ބައެއް ކަމަށް ވިދާޅުވެ، ވެރިކަންކުރާ ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާހު ނޫސްވެރިންގެ ބޮލުގައި ދޮގު އިލްޒާމް އަޅުވައިފި އެވެ.

އެކްސްގައި މިރޭ ކުރެއްވި ޕޯސްޓެއްގައި ފަލާހު ވިދާޅުވީ އޭނާ ޖަލުގަ އުޅޭނަމަ އެތަނުގެ ރަހްމަތްތެރިންނަށް ވާނީ އެމްޑީޕީގެ ވެރިކަންކުރި ރައީސުންނާއި އެމްޑީޕީގެ ގިނަ އަދަދެއްގެ މަޖިލިސް މެންބަރުންނާއި ނޫސްވެރިން ކަމަށެވެ. އަދި ޖަލުގައި އެންމެ ގިނަ ވާނީ ނޫސްވެރިން ކަމަށް އޭނާ ވިދާޅުވި އެވެ.

ޖަލުގައި އެ މީހުން ތިބެންޖެހޭ ސަބަބަކީ އިސްލާމްދީނުގެ އަސްލުތަކާ ހިލާފު ވާހަކަތައް ދައްކާފައިވުމާއި އިސްލާމްދީން ނޫން ދީންތައް ރާއްޖެ ގެނައުމަށް ވަކާލާތުކުރުން ކަމަށް ފަލާހު ވިދާޅުވި އެވެ.

ފަލާހު މިފަދައިން ވިދާޅުވިއިރު، އިސްލާމްދީނުގެ އަސްލުތަކާ ހިލާފު ވާހަކައެއް ނޫސްވެރިއަކު ދެއްކި މައްސަލައެއް އެއްވެސް އިރެއްގައި ފާހަގަވެފައެއްނެތެވެ. އަދި އަދި އިސްލާންދީން ނޫން އެހެން ދީންތައް ރާއްޖެ ގެނައުމަށް އެއްވެސް ނޫސްވެރިއަކު ވަކާލާތު ކުރި މައްސަލައެއް ދުވަހަކު ވެސް ރާއްޖޭގައި ފާހަގަވެފައެއްނެތެވެ.

މިއީ ފުލުހުންގެ އިދާރާ ހެކިވާނެ ކަމެކެވެ.

ނޫސްވެރިންގެ ބޮލުގައި ދޮގު އިލްޒާމް އެޅުވުމަށްފަހު ފަލާހު ވަނީ މީޑިއާގައި މަސައްކަތްކުރާ ފަރާތްތައް އުލުބައިންދާނެ ކަމަށް ބުނި ބުނުން ދިފާއުކޮށްފަ އެވެ. އެކަން އޭނާ ދިފާއުކުރީ "އުލުބޭންދުން" އަމިއްލައަށް މާނަކުރައްވައިގެންނެވެ.

އޭނާ ވިދާޅުވީ ރ. އަތޮޅު މީހުން އުލުބޭންދުމޭ ބުނަނީ ބަސް ނާހާ މީހުން ބިމަށްވުރެ މަތީ ތާކަށް އެރުވުމަށް ކަމަށެވެ. ނަމަވެސް ދިވެހި ބަހުގެ ރަދީފުގައި ވާގޮތުން އުލުބޭންދުމުގެ މާނައަކީ އަނިޔާވެރިކޮށް މަރާލުމެވެ.