މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އެތެރޭގެ އިންތިޚާބުގައި އެޕާޓީގެ އެކި މަގާމުތަކަށް ވާދަކުރަން ބޭނުންވާ ފަރާތްތަކަށް އެފުރުސަތު އަންނަ ހޮނިހިރު ދުވަހު ހުޅުވާލަން ނިންމައިފި އެވެ.

އެމްޑީޕީއިން ބުނީ އެޕާޓީގެ އެތެރޭގެ އިންތިހާބު ބޭއްވުމަށް ހަމަޖެހިފައިވަނީ މޭ މަހުގެ 29 ވަނަ ދުވަހު ކަމަށެވެ. އަންނަ ހޮނިހިރު ދުވަހު އެ ޕާޓީގެ ގުނަވަންތަކުގެ މަގާމުތަކަށް ކުރިމަތިލުމުގެ ފުރުޞަތު ހުޅުވައިލާނެ ކަމަށް އެ ޕާޓީން ބުނެ އެވެ.

އެ އިންތިހާބަށް ހުޅުވާލުމާއެކު ވާދަވެރި ކެމްޕޭނެއް މިހާރު ވަނީ ފެށިފަ އެވެ. މި އިންތިހާބުގައި ޕާޓީގެ އެކި މަގާމުތަކަށް މިނިސްޓަރުންނާއި މަޖްލިސް މެމްބަރުންނާއި ޕާޓީގެ އެކްޓިވިސްޓުން ވެސް ދަނީ ވާދަވެރި ކެމްޕޭނެއް ކުރަމުންނެވެ.

އެ އިންތިޚާބުގައި ވޯޓުލުމުގެ ހައްގު ލިބިފައިވާ ފަރާތްތަކުގެ ލިސްޓު ޢާންމުކޮށް އެ ލިސްޓުތަކަށް ޝަކުވާ ހުށަހެޅުމުގެ ފުރުސަތު މިމަހުގެ 28 ވަނަ ދުވަހުގެ ނިޔަލަށް ވަނީ ހުޅުވާލާފަ އެވެ.

އަދި އަންނަ މަހުގެ 5 ވަނަ ދުވަހު ވޯޓުލާ ފަރާތްތަކުގެ ދާއިމީ ލިސްޓު އިއުލާންކުރާނެ ކަމަށާއި، ކެނޑިޑޭޓުންގެ ފޯމުތައް ބަލައިގަތުން މޭ މަހުގެ 8 ވަނަ ދުވަހުގެ ހަވީރު 4:00 އާ ހަމައަށް ކުރިއަށް ގެންދާނެ ކަމަށްވެސް އެ ޕާޓީން ބުންޏެވެ.

އަދި މޭ މަހުގެ 9 ވަނަ ދުވަހު މަންދޫބުން ކަނޑައެޅުމުގެ ފުރުޞަތު ހުޅުވައިލާ 12 ވަނަ ދުވަހުގެ ހަވީރު 4 ޖެހުމާ ހަމައަށް އެ ފުރުޞަތު އޮންނާނެ ކަމަށް އެމްޑީޕީގެ ޓައިމްލައިނުގައި ވެއެވެ. އަދި އެ ދުވަހު ކެނޑިޑޭޓުންގެ އެންމެ ފަހުގެ ލިސްޓު ކެނޑިޑޭޓުންގެ ނަންބަރުތަކާއެކު އިއުލާނުކުރާނެ ކަމަށް އެ ޕާޓީން ބުނެފައިވެއެވެ.

މި އިންތިޚާބުގައި ވޯޓުލުމުގެ ޙައްޤު އޮންނާނީ މި މަހުގެ 18 ވަނަ ދުވަހުގެ ނިޔަލަށް އެމްޑީޕީގެ މެންބަރުންގެ ގޮތުގައި ތިބި އެ ޕާޓީގެ މެންބަރުންނަށެވެ. އަދި މިއަދުން ފެށިގެން މޭ މަހުގެ 29 ވަނަ ދުވަހާ ހަމައަށް އެ ޕާޓީން މެންބަރުޝިޕު ފޯމު ބަލައިނުގަންނަނާނެ އެވެ.