ފަތުރުވެރިންތަކެއް ގޮވައިގެން އދ. މަހިބަދޫން މާލެ ދަތުރުކުރަމުން ދިޔަ ސްޕީޑް ލޯންޗެއް ރާޅެއްގައި ޖެހި، ބިއްލޫރިގަނޑު ތަޅައިގެން ގޮސް މިއަދު ހިނގި ހާދިސާއެއްގައި ފަތުރުވެރިންތަކަކާއި ލޯންޗުގެ ފަޅުވެރިޔަކަށް އަނިޔާވެއްޖެ އެވެ.

ފުލުހުން ބުނީ މި ހާދިސާގައި އެ ލޯންޗުގެ ބިދޭސީ ފަޅުވެރިޔަކަށާއި ތިން ފަތުރުވެރިޔަކަށް އަނިޔާވެފައިވާ ކަމަށެވެ.

މި ހާދިސާ ހިނގިކަމުގެ މައުލޫމާތު ލިބިފައި ވަނީ މިއަދު ހެނދުނު 7:30 ހާއިރު ކަމަށް ފުލުހުން ބުންޏެވެ. އެ ގަޑިއަކީ އދ. އަތޮޅާއި މާލެ ސަރަހައްދު ހިމެނޭ ގޮތަށް، މެޓް އޮފީހުން ވައިޓް އެލާޓް ނެރެފައިވާ ގަޑިއެކެވެ. އެގޮތުން، ބޯކޮށް ވާރޭވެހުމާއެކު ގުގުރައި، ވިލާގަނޑުގައި 40 މޭލަށް ވައިގަދަވާނެ ކަމަށް އެ އިދާރާއިން އޮތީ ލަފާކޮށްފަ އެވެ.

ލޯންޗުގެ ބިއްލޫރިގަނޑު ތަޅައިގެން ދާން މެދުވެރިވީ އެ ލޯންޗު އަލިހުރަސް ކަނޑުން ދަތުރުކުރަމުން ދަނިކޮށް ނެގި ރާޅެއްގައި ޖެހުމުން ކަމަށް ފުލުހުން ބުނެ އެވެ.

ފުލުހުން ބުނީ މި ހާދިސާގައި އަނިޔާވި ތިން ފަތުރުވެރިންނަށް، މާލެއާ ކައިރި ކްރޮސްރޯޑްސްއިން ފަރުވާދިން ކަމަށެވެ. އަދި، ލޯންޗުގެ ފަޅުވެރިޔާއަށް އޭޑީކޭ ހޮސްޕިޓަލުގައި ފަރުވާދެމުން އަންނަ ކަމަށެވެ.

މި ހާދިސާގައި ލޯންޗަށް އެކިވަރުގެ ގެއްލުން ވެފައިވާ ކަމަށް ފުލުހުން ބުންޏެވެ.

ފުލުހުން އަންނަނީ މި ހާދިސާ އިތުރަށް ތަހުގީގުކުރަމުންނެވެ.

މޫސުމާ ބެހޭ ގައުމީ އިދާރާއިން މިހާރު ވެސް އޮތީ މެދުރާއްޖެ ތެރެއަށް ވައިޓް އެލާޓް ނެރެފައެވެ. އެގޮތުން ރ. އަތޮޅުން ފެށިގެން ތ. އަތޮޅަށް ނެރެފައިވާ އެލާޓްގައި ވަނީ، ހަވީރު 4:30 އިން ފެށިގެން ރޭގަނޑު 10:30 އަށް ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 45 މޭލަށް ވައިގަދަވެ، ކަނޑުތައް ގަދަވާނެ ކަމަށް ލަފާކޮށްފަ އެވެ.