ބޮލީވުޑްގެ މަޝްހޫރު ކުރީގެ އެކްޓަރު ދަރްމެންދްރާގެ ހަނދާނަށް އިންޑިއާގައި ދެވޭ ދެވަނައަށް އެންމެ ޝަރަފުވެރި ގައުމީ އިނާމު "ޕަދްމާ ވިބުޝަން" އަރުވައިފި އެވެ.

އިންޑިއާގެ ސަރުކާރުން ދަރްމެންދްރާއަށް އެ ޝަރަފު އަރުވާފައިވަނީ އެ ގައުމުގެ މުނިފޫހި ފިލުވުމުގެ ދާއިރާއަށް އޭނާ ކޮށްދީފައިވާ ޚިދުމަތްތަކުގެ އަގު ވަޒަން ކުރުމުގެ ގޮތުންނެވެ.

މި ޝަރަފާއެކު ދަރްމެންދްރާގެ އަންހެނުން ހެމާ މާލިނީ އޭނާގެ އެކްސް އެކައުންޓްގައި ހިއްސާކުރި ޕޯސްޓެއްގައި ބުނެފައިވަނީ ސަރުކާރުގެ ފަރާތުން ދަރްމެންދްރާގެ ހިދުމަތްތައް ފާހަގަކޮށް އަގުވަޒަން ކުރީތީ އުފާކުރާ ކަމަށާއި އެކަމާ ފަހުރުވެރިވާ ކަމަށެވެ.

1960 ވަނަ އަހަރު ބޮލީވުޑަށް ތައާރަފްވި ދަރުމެންދްރާ ވަނީ އޭގެ ފަހުން ފާއިތުވި 60 ވަރަކަށް އަހަރު ތެރޭގައި ބޮލީވުޑްގެ ގިނަ ކާމިޔާބީތަކެއް ހޯދާފަ އެވެ.

ސިއްހީ ހާލު ދަށްވެ އުމުރުން 89 އަހަރުގައި ދަރްމެންދްރާ މަރުވީ މިދިޔަ އަހަރުގެ ނޮވެމްބަރު މަހުގެ 24 ވަނަ ދުވަހު އެވެ. އޭނާގެ ޖަނާޒާގައި ބޮލީވުޑްގެ ގިނަ ތަރިންތަކެއް ބައިވެރިވި އެވެ.

ދަރްމެންދްރާ މަރުވިއިރު އޭނާގެ ދެ އަނބިން ތިބިއިރު އެ ދެ ކައިވެންޏަށް ޖުމްލަ ހަ ކުދިން ލިބުނެވެ. އޭގެ ތެރޭގައި ސަނީ ޑިއޯލް، ބޮބީ ޑިއޯލް އަދި އީޝާ ޑިއޯލް ހިމެނެ އެވެ.