ބޮލީވުޑްގެ މަޝްހޫރު ޑިއޯލް އާއިލާގެ މެދުގައި މައްސަލަޖެހި އެ އާއިލާގެ މެމްބަރުން އެކަކު އަނެކަކާ ވާހަކަ ނުދައްކާ ކަމަށް މީޑިއާގައި ފެތުރެމުން އަންނަ ވާހަކަތަކަށް ނިމުމެއް ގެނެސްފި އެވެ.

އެ އަޑުތަކަށް އެ އާއިލާއިން ނިމުމެއް ގެނެސްފައި މިވަނީ ސަނީ ޑިއޯލްގެ ފިލްމު "ބޯޑާ 2"ގެ ސްކްރީނިންއަށް ސަނީއާއި އޭނާގެ އެއްބަފާ ކޮއްކޮމެން އެކުގައި ގޮސްގެންނެވެ.

މިދިޔަ އަހަރުގެ ނޮވެމްބަރު މަހު އެ މީހުންގެ ބައްޕަ ދަރްމެންދްރާ މަރުވި ފަހުން އެ އާއިލާގެ މެދުގައި ހަމަނުޖަހުންތައް އުފެދިފައިވާ ކަމަށް މީޑިއާ ރިޕޯޓުތައް ދިޔައީ ބުނަމުންނެވެ.

އެހެން ނަމަވެސް ސަނީއާއެކު އޭނާގެ ކޮއްކޮމެން ކަމަށްވާ އީޝާ ޑިއޯލްއާއި އަހާނާ ޑިއޯލް ފެނުމުން އެ ހަބަރުތަކަކީ ދޮގެއްކަން މިހާރު ވަނީ ހާމަވެފަ އެވެ.

އެގޮތުން ސްކްރީނިންއަށް އެ ތިން ބެއިން އެކުގައި ގޮސް މީޑިއާތަކަށް ފޮޓޯ ނަގަން ފުރުސަތު ދީފައިވާ ކަމަށް ވެސް ހަބަރުތައް ބުނެފައިވެ އެވެ.

ދަރްމެންދްރާގެ ހަޔާތުގައި ދެ ކައިވެންޏެއް ކުރިއިރު ފުރަތަމަ ކައިވެންޏަށް ސަނީއާއި ބޮބީއާއެކު ހަތަރު ކުދިން ލިބިފައިވެ އެވެ. އެއަށްފަހު ހެމާ މާލިނީއާއެކު ކުރި ކައިވެންޏަށް އީޝާއާއި އަހާނާ ލިބުނެވެ.