މަޝްހޫރު ރިއަލިޓީ ޝޯ "އެމެރިކަން އައިޑަލް"ގެ 24 ވަނަ ސީޒަން ފެށެން ކުޑަތަން ވެފައިވާއިރު މީގެ ކުރީގެ ސީޒަންތައް ކާމިޔާބުކުރި ތަރިންގެ ވާހަކަ އަނެއްކާ ވެސް މިވަނީ ފެންމަތިވެފަ އެވެ.

އެގޮތުން މިދިޔަ އަހަރު ބޭއްވި އެ ޝޯގެ 23 ވަނަ ސީޒަން ކާމިޔާބުކުރި ޖަމާލް ރޮބާޓްސްއަކީ މިހާރު ސޯޝަލް މީޑިއާގައި އެ ތަރިއެއްގެ ވާހަކަ އެންމެ ގިނައިން ދެކެވޭ އެއް ތަރި އެވެ.

އެމެރިކަން އައިޑަލްގެ އޮޑިޝަން ބުރުގައި އޭނާ ހުށައަޅައިދިން ލަވައާއެކު ވެސް ފަނޑިޔާރުންނާއި އާއްމުންގެ މަގުބޫލުކަން ހޯދި ޖަމާލް އެ މުބާރާތުގެ ފަހުރުވެރި އެއްވަނަ ހޯދީ ރަނަރަޕް ލިބުނު ޖޯން ފޮސްޓާ ފަހަތަށް ޖައްސާލުމަށްފަހުގަ އެވެ.

ޕްރައިމަރީ ސްކޫލް ފިޒިކަލް އެޑިއުކޭޝަން ޓީޗަރެއްގެ ގޮތުގައި މަސައްކަތްކުރާ ޖަމާލްއަކީ ފާއިތުވި 20 އަހަރު ތެރޭގައި އެމެރިކަން އައިޑަލްގެ ލަގަބު ހޯދި ފުރަތަމަ ކަޅު ނަސްލުގެ ތަރި އެވެ. މީގެ ކުރިން ކަޅު ނަސްލުގެ ތަރިއަކަށް އެ ޝަރަފު ލިބުނީ 2003ގަ އެވެ.

މިސިސިޕީއަށް ނިސްބަތްވާ ޖަމާލްގެ ޒާތީ ދިރިއުޅުމުގެ މާ ބޮޑު މައުލޫމާތެއް މީޑިއާއަށް ހާމަވެފައި ނެތް ނަމަވެސް އޭނާއަކީ ތިން އަންހެން ކުދިންގެ ބައްޕަ އެކެވެ.

މިދިޔަ އަހަރުގެ މެއި މަހު އެމެރިކަން އައިޑަލް ކާމިޔާބު ކުރުމަށްފަހު ޖަމާލްގެ އިންސްޓަގްރާމްގައި ހިއްސާކުރި ޕޯސްޓުގައި އޭނާ ވަނީ އޭނާގެ ދަރިންނާއި އޭނާގެ ހުނަރަށް އިތުބާރުކުރި އެންމެންނަށް ޝުކުރު އަދާކޮށްފަ އެވެ.