ހޮލީވުޑްގައި މަސައްކަތްކުރާ އަންހެން ތަރިންނާ މެދު އެ ދާއިރާގައި އުޅޭ އެހެން މީހުން ކަންތައްތައް ކުރަނީ ވަރަށް އިހާނެތިކޮށް ކަމަށް ޓްވިލައިޓްގެ ތަރި ކްރިސްޓަން ސްޓެވާޓް ބުނެފި އެވެ.

ދާދި ފަހުން މީޑިއާއަށް ދިން އިންޓަވިއުއެއްގައި ކްރިސްޓަން ވަނީ ހޮލީވުޑްގެ އަންހެން ތަރިންނަށް ކުރިމަތިވާ ތަފާތު ކުރުންތަކާ ބެހޭގޮތުން ވާހަކަ ދައްކާފަ އެވެ.

އެގޮތުން ގިނަ ޕްރޮޑިއުސަރުން އަންހެން ތަރިންނާ މެދު ކަންތައް ކުރަނީ "ބުދުތަކެއް" ހެން ކަމަށާއި އަންހެނުންނަށް ވުމުން ލިބޭ އަގާއި މުސާރަ ވެސް ތަފާތުވާ ކަމަށް ކްރިސްޓަން ބުނެފައިވެ އެވެ.

"ގިނަ މީހުންނަށް ހީވަނީ ޑައިރެކްޓަރުންނަކީ އާދަޔާ ހިލާފު ބާރުތަކެއް ލިބިގެންވާ ބައެކޭ. އަންހެނަކަށް ވާނަމަ އެކަން އަދި އިތުރަށް ގޯސްވޭ" ކްރިސްޓަން ބުންޏެވެ.

އެއާއެކު ފިރިހެން އެކްޓަރުންގެ ދަރަޖަ މާ މަތިކޮށް ބެލެވޭ ކަމަށާއި އޭނާގެ އަމިއްލަ ތަޖުރިބާއިން ވެސް އެކަން އެނގިފައިވާ ކަމަށް ކްރިސްޓަން ބުންޏެވެ.

"ޓްވިލައިޓް"އިން އާއްމުންގެ މަގުބޫލުކަން ހޯދި ކްރިސްޓަން ވަނީ އޭނާގެ ކުރިއަށް އޮތް ފިލްމު "ކްރޮނޮލޮޖީ އޮފް ވޯޓާ"އާއެކު ޑައިރެކްޝަން ކެރިއަރު ފަށާފަ އެވެ.