ޓިކްޓޮކް އިންފްލުއެންސާ ޝެހެނާޒް މޫސާ (ޝެހޭ)، ހުޅުމާލޭގައި ހުންނަ އަމާން ދޯދި ފްލެޓެއް މަހަކު 23،000 ރުފިޔާއަށް ކުއްޔަށް ދޭން މީސްމީޑިއާގައި އިޝްތިހާރު ކުރި މައްސަލައެއް ހޫނުވެއްޖެ އެވެ.

ޝެހެނާޒް ޖެހި އެ ޕޯސްޓުގައި ގުޅުމަށް ދީފައިވާ ނަންބަރާ ހަވާލާދީ މީސްމީޑިއާގައި މީހަކު ވަނީ އެއީ އަމާން ދޯދި ފްލެޓެއް ކަމަށް ބުނެ، ފަހި ދިރިއުޅުން ކޯޕަރޭޝަން (އެފްޑީސީ)ގެ މެނޭޖިން ޑިރެކްޓަރު ހަމްދާން ޝަކީލްގެ ސަމާލުކަމަށް އެކަން ގެނެސްފަ އެވެ.

އެކަމާ ގުޅިގެން ހަމްދާން ވިދާޅުވީ އެކަން ބެލުމަށް ޓީމަށް އަންގާފައިވާނެ ކަމަށެވެ. އެފްޑީސީގެ ފްލެޓްތަކަކީ އާމްދަނީ ހޯދުމަށް ކުއްޔަށް ދިނުމަށް ދޫކޮށްފައިވާ ތަންތަން ނޫން ކަމަށާއި، އެގޮތަށް ކުއްޔަށް ދިނުމުން އެފްޑީސީއާއި އެތަން ލިބިފައިވާ ފަރާތާ ދެމެދު ހެދިފައިވާ އެއްބަސްވުމާ ހިލާފުވެވުނީ ކަމަށް ހަމްދާން ވިދާޅުވި އެވެ.

މިފަދަ ފަރާތްތައް 50،000 ރުފިޔާއިން ޖޫރިމަނާކޮށް އެތަން ކުއްޔަށް ދޫކުރާ ފަރާތް ނުވަތަ އެތަނުގެ ވެރިފަރާތާއެކު ވެފައިވާ އެއްބަސްވުން ވަގުތުން ބާތިލުކުރާނެ ކަމަށް ހަމްދާން ވިދާޅުވި އެވެ. އެފަދައިން ފްލެޓްތައް ކުއްޔަށް ދިނުމަކީ ގެދޮރު އިމާރާތް ކުރުމުގެ މަޝްރޫއުތަކުގެ މަޤުސަދު ނިގުޅައިގަނެވޭ ކަމެއް ކަމަށް ހަމްދާން ވިދާޅުވި އެވެ.

އަމާން ދޯދި ފްލެޓްތަކަކީ ހުޅުމާލޭ ދެވަނަ ފިޔަވަހީގައި އެފްޑީސީން އިންޑިއާގެ އެންބީސީސީއާ ހަވާލުކޮށްގެން އިމާރާތްކޮށްފައިވާ ފްލެޓްތަކެކެވެ. ތިން ކޮޓަރީގެ އެ ފްލެޓްގެ އަސްލު ކުއްޔަކީ މަހަކު 10،500 ރުފިޔާ އެވެ.