ގުދުރަތީ ރީތިކަމަށް ލޯބިކުރާ މީހަކަށް، ކްރޮއޭޝިއާގެ ޕްލިޓްވިސޭ ލޭކްސް ނޭޝަނަލް ޕާކްއަކީ ހުވަފެނެއް ފަދަ ތަނެކެވެ. މިއީ ހަމައެކަނި ޕާކެއް ނޫނެވެޑ މިއީ 16 ކުޅިއާއި، އެތައް ސަތޭކަ އޮހޭ ފެންގަނޑުތަކެއް ގުޅިފައިވާ، ކުލަގަދަ މަންޒަރެކެވެ.
1979 ވަނަ އަހަރުން ފެށިގެން ޔުނެސްކޯ ވޯލްޑް ހެރިޓޭޖް ސައިޓެއްގެ ގޮތުގައި ކަނޑައަޅާފައިވާ މި ތަނަކީ ކްރޮއޭޝިއާގެ އެންމެ މަގުބޫލު އެއް މަންޒިލެވެ.
ފެނުގެ ކުލަ ބަދަލުވާ އާދަޔާޚިލާފު މަންޒަރު
މި ޕާކުގެ އެންމެ ހައިރާންކުރުވަނިވި ސިފައަކީ ކުޅިތަކުގެ ފެނުގެ ކުލައެވެ. ބަލާލި ކޮންމެ ދިމާލަކުން ފެންނަނީ ބްރިލިއަންޓް އެޒޫރް (ނޫކުލަ)، ގަދަ ފެހި ނުވަތަ ވިލުނޫ ކުލަ އެވެ.
މި ކުލަތައް ބަދަލުވަނީ ފެނުގައި ހުންނަ މިނަރަލްތަކާއި، އިރުގެ އަލި އެޅޭ ގޮތުގެ މައްޗަށެވެ. އެ މަންޒަރު ހިތަށް ސިފަވަނީ ކުރެހުންތެރިއަކު އޭނާގެ ކުލަ ފިލައިން މުޅި ސަރަހައްދުގައި ކުލަ ޖައްސާފައިވާ ހެންނެވެ.
ގުދުރަތީ މި "ފާލަންތައް" އުފެދުނީ ކިހިނެއް؟
ޕްލިޓްވިސޭގެ ރީތިކަމުގެ އަސްލަކީ "ޓްރެވަރޓީން" އެވެ. މިއީ ފެނުގައި ހުންނަ ކެލްސިއަމް ކާބަނޭޓް، ފެހި އަދި މޮސް އާ އެކުވެގެން އުފެދޭ ގަލުގެ ފާލަން ތަކެކެވެ.
މި ފާލަންތައް ކޮންމެ އަހަރަކު ގާތްގަނޑަކަށް 1 ސެންޓިމީޓަރު ބޮޑުވެ އެވެ.މިކަމުގެ ސަބަބުން ފެންގަނޑުތަކުގެ ބައްޓަމާއި ފުންމިން އަބަދުވެސް ބަދަލުވަމުންދެ އެވެ. އެހެންކަމުން މިއީ "ދިރިހުރި" ބިނާއެއް ފަދަ ތަނެއް ކަމުގައި ބުނެވިދާނެ އެވެ.
ޕާކު ތެރޭގައި ކުރެވިދާނެ ކަންތައްތައް
މި ބޮޑު ޕާކު ބަލާލުމަށްޓަކައި ލަކުޑިން ހަދާފައިވާ ހިނގާ މަގުތަކެއް މުޅި ސަރަހައްދުގައި ފަތުރާލެވިފައިވެ އެވެ.
ހިނގާލުން: 18 ކިލޯމީޓަރުގެ ހިނގާ މަގުތަކުން ކުޅިތަކުގެ މަތިންނާއި ފެންގަނޑުތަކުގެ ކައިރިން ހިނގާލުމުގެ ފުރުސަތު ލިބެ އެވެ.
އިލެކްޓްރިކް ބޯޓު: އެންމެ ބޮޑު ކުޅި ކަމަށްވާ "ކޯޒްޖެކް" ހުރަސްކުރުމަށް އިލެކްޓްރިކް ބޯޓު ބޭނުންކުރެވެ އެވެ.
ވެލިކީ ސްލެޕް: މިއީ ކްރޮއޭޝިއާގެ އެންމެ އުސް ފެންގަނޑެވެ. 78 މީޓަރު މަތިން ފެން އޮހޭ މަންޒަރަކީ ހިތްގައިމު މަންޒަރެކެވެ.
ހަތަރު މޫސުމުގެ ތަފާތު ރީތިކަން
ޕްލިޓްވިސޭ އަކީ ކޮންމެ މޫސުމެއްގައިވެސް ތަފާތު ސިފައެއްގައި ފެންނަ ތަނެކެވެ.
ހޫނު މޫސުން: މުޅި ތަން އޮންނަނީ ވަރަށް ފެހިކޮށް، ފެންގަނޑުތައް ގަދައަށް އޮހެމުންނެވެ.
ޚަރީފް މޫސުން: ގަސްތަކުގެ ފަތްތައް ރަތް އަދި ރަން ކުލައަށް ބަދަލުވުމުން، ފެނުގެ ނޫކުލައާއެކު ފެންނަނީ އަޖައިބެއް ފަދަ މަންޒަރެކެވެ.
ފިނި މޫސުން: މުޅި ސަރަހައްދުގައި ބޯކޮށް ސްނޯ ފައިބައި، ފެންގަނޑުތައް ގަނޑުވެގެން ދިއުމުން، މިއީ "ނާނިއާ" ފިލްމެއްގެ މަންޒަރެއް ފަދަ އެވެ.
ޒިޔާރަތްކުރާ ފަރާތްތަކަށް މުހިންމު ނޯޓެއް
މި ތަނުގެ ގުދުރަތީ މާހައުލު ރައްކާތެރިކުރުމަށްޓަކައި ކުޅިތަކަށް އެރި ފަތައި ހެދުމަކީ މަނާކަމެކެވެ. މި ގަވާއިދުގެ ސަބަބުން މި ސަރަހައްދުގެ ފެންގަނޑުތައް އަދިވެސް އޮތީ އެއްވެސް ތަޣައްޔަރުކަމެއް ނެތް ސާފުކަންމަތީގައެވެ.
ޕްލިޓްވިސޭ ލޭކްސް އަކީ ފޮޓޯއަކުން ފެންނަ ވަރަށްވުރެ މާ ރީތި، ކޮންމެ މީހަކުވެސް ހަޔާތުގައި އެއްފަހަރު ނަމަވެސް ބަލާލުން މުހިންމު ތަނެކެވެ.
