ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް އުފުލާފައިވާ މަނީ ލޯންޑްރިން އަދި ރިޝްވަތު ހިފުމުގެ ދައުވާތަކުން ދިފާއުވުމަށް އެމަނިކުފާނުގެ ފަރާތްޕުޅުން ހުށަހެޅުއްވި ދިފާއީ ހެކިތައް ބަލައިނުގަތުމަށް ދައުލަތުން ކްރިމިނަލް ކޯޓުގައި މިއަދު އެދިއްޖެ އެވެ.

އާރަށުގެ މައްސަލައިގައި ރައީސް ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގަވައި، އެ ފައިސާ ލޯންޑަކުރެއްވި ކަމަށް ސާބިތުވާ ކަމަށް ކަނޑައަޅައި، އެމަނިކުފާނުގެ މައްޗަށް 11 އަހަރުގެ ޖަލު ހުކުމެއް ކްރިމިނަލް ކޯޓުން އިއްވީ 25 ޑިސެމްބަރު 2022 ގައެވެ. ނަމަވެސް، އެ ހުކުމް އިއްވީ ދައުލަތުން ހުށަހެޅި އާ ހެކިތަކެއްގެ މައްޗަށް ބިނާކޮށް ކަމަށްވާތީ، ޔާމީންގެ ފަރާތްޕުޅުން އެ މައްސަލަ ހައި ކޯޓުގައި އިސްތިއުނާފު ކުރުމުން، އެ ކޯޓުން ވަނީ އެ ހެކިތައް ބަލައިގަތީ ގޯސްކޮށް ކަމަށް ނިންމައި، މައްސަލަ އަލުން ބެލުމަށް ދަށު ކޯޓަށް ތަހުވީލުކޮށްފަ އެވެ. ސުޕްރީމް ކޯޓުން ވެސް ވަނީ އެ ހެކިތައް ބަލައިގަތުމަކީ ގޯހެއް ކަމަށް ކަނޑައަޅާފަ އެވެ.

މި މައްސަލަ އަލުން ބެލުމަށް މިއަދު ކްރިމިނަލް ކޯޓުގައި ބޭއްވި އަޑުއެހުމުގައި އޮތީ ޝަރީއަތުގެ ކުރިން ހުށަހަޅާ ހުށަހެޅުންތަކާ މެދު ދެފަރާތުން ބަހުސްކުރުމެވެ.

މި މައްސަލައިގައި ރައީސް ޔާމީންގެ މައިގަނޑު ދިފާއަކީ އެކައުންޓަށް ޖަމާވި ފައިސާއަކީ ޑޮލަރު މާރުކުރުމުގެ މުއާމަލާތަކުން ލިބުނު ފައިސާ ކަމަށް ވިދާޅުވާ ވިދާޅުވުމެވެ. މިކަން ސާބިތުކުރުމަށްޓަކައި އެމަނިކުފާނުގެ ފަރާތްޕުޅުން ވަނީ ޔޫތު މިނިސްޓަރުގެ އެޑްވައިޒަރު އަހުމަދު ނަރީޝް އާއި، ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު މުހައްމަދު އިސްމާއިލް އަދި ހުޅުދޫ ދާއިރާގެ މެންބަރު މުހައްމަދު ޝާހިދުގެ އިތުރުން ޢަބްދުﷲ ރަޝީދު ކިޔާ ފަރާތެއް ހެކީގެ ގޮތުގައި ހުށަހަޅާފައެވެ. މީގެއިތުރުން ޑޮލަރު މާރުކުރި ކަމުގެ ލިޔުމެއް ވެސް ޝަރީއަތަށް ހުށަހަޅާފައިވެ އެވެ.

ނަމަވެސް، ދައުލަތުގެ ވަކީލުން ވަނީ މި ހެކިތައް ބަލައިނުގަތުމަށް ކޯޓުގައި އެދިވަޑައިގެންފަ އެވެ. ދައުލަތުން ފާހަގަކުރި ސަބަބަކީ، ތަހުގީގު މަރުހަލާގައި ރައީސް ޔާމީން ހަނުހުރުމުގެ ހައްގު ބޭނުންކުރައްވާފައިވާތީ، އެ މަރުހަލާގައި ހާމަނުކުރައްވާ ދިފާއީ ހެކިތަކެއް ފަހުން ޝަރީއަތަށް ހުށަހެޅުމުގެ ފުރުސަތު ދެވިގެން ނުވާނެ ކަމަށް ބުނެ އެވެ.

މި ލިޔުމާ ގުޅޭ އިތުރު ލިޔުން
Yameen ge mahchah koffaivaa aarashu massalaige aduehumeh fashaifi ޔާމީންގެ އާރަށު މައްސަލައިގެ އަޑުއެހުމެއް ފަށައިފި