Flydubai boat hijack kuran ulhunu massalaige thahugeegah UAE in 2 dhivehin hayyaru koffi

ދުބާއީން ފުރައިގެން އިޒްރޭލަށް ދަތުރުކުރި ފްލައިދުބާއީގެ ފްލައިޓެއް ހައިޖެކްކޮށް، ޓެރަރިސްޓް ހަމަލާއެއް ދޭން އުޅުނު ކަމުގެ ތުހުމަތުގައި ހައްޔަރުކުރި އޮމާންގެ ކޯ-ޕައިލެޓާ ގުޅުން އޮތް ކަމަށް ބެލެވޭ ދެ ދިވެއްސަކު ޔުނައިޓެޑް އަރަބް އެމިރޭޓްސް (ޔޫއޭއީ) ގެ ސަލާމަތީ ބާރުތަކުން ހައްޔަރުކޮށްފި އެވެ.

މައުލޫމާތު ލިބިފައިވާ ގޮތުގައި ޔޫއޭއީން ހައްޔަރުކުރި ދެ ދިވެހިންނަކީ ވެސް ފްލައިދުބާއީގައި ކޯ-ޕައިލެޓުންގެ ގޮތުގައި މަސައްކަތްކުރަމުން އަންނަ ދެ މީހުންނެވެ. އަދި އެ މީހުން ދިރިއުޅެމުން ދިޔައީ ހާދިސާ ހިންގި ކޯ-ޕައިލެޓް، އުމުރުން 29 އަހަރުގެ ހައްމާމް އަލް-ހައްމާމީއާ އެއް އިމާރާތެއްގަ އެވެ. މީގެއިތުރުން، މި ދެ ދިވެހި ޕައިލެޓުންނަކީ ވެސް އެ އެއާލައިންގެ ދަތުރުތަކުގައި އިޒްރޭލަށް އުދުހިފައިވާ ބައެއް ކަމަށް އެނގިފައިވެ އެވެ. ނަމަވެސް، މި ހާދިސާއާ އެ ދެ މީހުންނާ އޮތީ ސީދާ ކޮން ކަހަލަ ގުޅުމެއް ކަމެއް އަދި ސާފެއް ނުވެ އެވެ. އަދި މިކަމާ ގުޅޭގޮތުން ދެ ގައުމުގެ ރަސްމީ އެއްވެސް އިދާރާއަކުން އަދި ވަކި އެއްޗެއް ހާމަކޮށްފައެއް ނުވެ އެވެ.

މިދިޔަ ބުދަ ދުވަހު ހިނގި މި ނުރައްކާތެރި ހާދިސާ ހިނގާފައިވަނީ އިޒްރޭލުގެ ގިނަ އަދަދެއްގެ ރައްޔިތުން ހިމެނޭހެން 182 ފަސިންޖަރުންނާއެކު ދަތުރުކުރި ފްލައިޓެއްގަ އެވެ. ދަތުރުގެ ތެރެއިން، ބޯޓުގެ ކޯ-ޕައިލެޓް ވަނީ ކޮކްޕިޓްގައި އޮންނަ "ކްރޭޝް ހެމާ" އިން ބޯޓުގެ ކެޕްޓަނަށް ހަމަލާދީ ޒަހަމްކޮށްލައިފަ އެވެ. ނަމަވެސް، ޒަހަމްވެފައިވާ ޕައިލެޓް ވަގުތުން ކޮކްޕިޓްގެ ދޮރު ހުޅުވުމާއެކު، ފްލައިޓް އެޓެންޑެންޓުންނާއި ބައެއް ފަސިންޖަރުން އެތެރެއަށް ވަދެ ކޯ-ޕައިލެޓް ހިފަހައްޓައި ބޯޓުގެ ކޮންޓްރޯލް ހޯދި އެވެ. މި ހާދިސާއާ ގުޅިގެން ބޯޓު ވަނީ ކުއްލި ހާލަތުގައި ސައުދީ އަރަބިއްޔާގެ ތަބޫކް އެއާޕޯޓަށް ޖައްސައިފަ އެވެ.

ޔޫއޭއީގެ ކަމާބެހޭ އިދާރާތަކުން ބުނެފައިވަނީ މިއީ ޓެރަރިސްޓް ހަމަލާއެއް ދިނުމުގެ ނިޔަތުގައި ހިންގާފައިވާ އަމަލެއް ކަމަށެވެ. އަދި ހަމަލާދިން ހައްމާމް އަލް-ހައްމާމީއަކީ ހައްދުފަހަނައެޅި ފިކުރުތަކަށް ތާއީދުކުރާ މީހެއް ކަމަށް ބެލެވިގެން، އޭނާއަށް ޕައިލެޓްކަން ކުރުމުގެ ހުއްދަ ނުދިނުމަށް އޮމާންގެ އިދާރާތަކުން ކުރިން ނިންމާފައިވާ ކަމަށްވެސް ޔޫއޭއީން ބުނެ އެވެ. އެހެންކަމުން، އޭނާއަށް ފްލައިދުބާއީން ވަޒީފާ ލިބުނު ގޮތުގެ ތަހުގީގެއްވެސް މިހާރު ދަނީ ހިންގަމުންނެވެ.

މި މައްސަލައާ ގުޅިގެން ޔޫއޭއީގެ އެޓާނީ ޖެނެރަލް ވިދާޅުވީ، މި އަމަލުގެ ފަހަތުގައިވާ އަސްލު މަގުސަދު ދެނެގަތުމަށާއި، ބޭރުގެ އެހެން އެއްވެސް ޖަމާއަތަކާ އޭނާއާ ގުޅުމެއް އޮތްތޯ ކަށަވަރުކުރުމަށްޓަކައި، ސަރަހައްދީ ސަލާމަތީ އިދާރާތަކާ ގުޅިގެން ވަރަށް ފުޅާ ދާއިރާއެއްގައި ތަހުގީގު ކުރިއަށް ގެންދާ ކަމަށެވެ.