އިޒްރޭލަށް ދަތުރުކުރި ފްލައިދުބާއީގެ ފްލައިޓެއްގެ ކޮކްޕިޓް ތެރޭގައި ދެ ޕައިލެޓުންގެ ދެމެދުގައި ހިނގި ހަމަނުޖެހުމަކާ ގުޅިގެން، ކުއްލި ނުރައްކަލުގެ ސިގްނަލެއް ފޮނުވުމުން، މަތިންދާބޯޓު ހައިޖެކްކުރީ ކަމަށް ބަލައި އިޒްރޭލުގެ ހަނގުރާމަމަތީ މަތިންދާބޯޓުތައް ފޮނުވައިފި އެވެ.

މި ހާދިސާއާ ގުޅިގެން ބޯޓު ވަނީ ސައުދީ އަރަބިއްޔާއަށް ކުއްލި ގޮތަކަށް ޖައްސާފަ އެވެ.

ދުބާއީން ފުރައިގެން ތެލް އަވީވަށް ދަތުރުކުރި މި ފްލައިޓް ސައުދީ އަރަބިއްޔާގެ ތަބޫކަށް ސަލާމަތްތެރިކަމާއެކު ޖައްސާފައިވާ ކަމަށާއި، ބޯޓުން ދަތުރުކުރި އެންމެންގެ ހާލުވެސް ރަނގަޅު ކަމަށް އޮފިޝަލުން ބުނެ އެވެ.

މި ހާދިސާއާ ގުޅޭގޮތުން މައުލޫމާތު ލިބިފައިވާ ސަރަހައްދީ އޮފިޝަލަކު ވިދާޅުވި ގޮތުގައި، ކޮކްޕިޓް ތެރޭގައި ހަމަނުޖެހުމެއް ހިނގާފައިވަނީ ދެ ޕައިލެޓުންގެ ދެމެދުގަ އެވެ. ނަމަވެސް މި ހަމަނުޖެހުން ހިނގަން މެދުވެރިވި ސަބަބެއް އަދި ސާފެއް ނުވެ އެވެ.

އިޒްރޭލުގެ ސަލާމަތީ އޮފިޝަލުންނާ ހަވާލާދީ އެ ގައުމުގެ މީޑިއާތަކުން ވެސް ރިޕޯޓުކޮށްފައި ވަނީ ކުއްލި ހާލަތުގައި ބޯޓު ޖައްސަން ޖެހުނީ ދެ ޕައިލެޓުންގެ ދެމެދުގައި އުފެދުނު ދެބަސްވުމެއްގެ ސަބަބުން ކަމަށެވެ.

ގިނަ އަދަދެއްގެ އިޒްރޭލު ރައްޔިތުންނާއެކު ދަތުރުކުރި މި ބޯޓު ހައިޖެކްކުރީ ކަމަށް ބަލައި، އިޒްރޭލުގެ ސަލާމަތީ ބާރުތަކުން ވަނީ ވަގުތުން ފިޔަވަޅު އަޅާފަ އެވެ.

ފްލައިޓް ޓްރެކިން މައުލޫމާތުތަކުން ދައްކާ ގޮތުގައި، ދަތުރުގެ މެދުތެރެއިން ބޯޓުން ވަނީ ކުއްލި ނުރައްކަލުގެ ސިގްނަލެއް ފޮނުވާފަ އެވެ. ދުބާއީން ފުރައިގެން ތެލް އަވީވްގެ ބެން ގޫރިއަން އެއާޕޯޓަށް ދަތުރުކުރި ފްލައިޓް FZ1073 މި ހާދިސާއާ ގުޅިގެން މިސްރާބު ބަދަލުކޮށް ޖެއްސީ ސައުދީގެ ތަބޫކަށެވެ.

ބޯޓުން ދަތުރުކުރި ފަސިންޖަރުން ބުނި ގޮތުގައި، މި ހާދިސާ ހިނގި ވަގުތު ބޯޓު ތެރޭގައި ވަނީ ވަރަށް ބޮޑަށް ބިރުވެރިކަން އުފެދިފަ އެވެ. ބޯޓުގެ ކުރީކޮޅުގައި ތިބި ފަސިންޖަރުންނަށް ކޮކްޕިޓް ތެރެއިން ހަޅޭއްލަވާ އަޑުއިވުނު ކަމަށާއި، ސައުދީއަށް ޖެއްސުމުގެ ކުރިން ބޯޓު ކުއްލިއަކަށް ތިރިއަށް ލަނބާލި ކަމަށް ވެސް ފަސިންޖަރުން ބުނެފައިވެ އެވެ. ބޯޓު ޖެއްސުމަށްފަހު، ސައުދީގެ ސަލާމަތީ ބާރުތަކުން ބޯޓު ވަށާލާފައި ވާތީ، ފަސިންޖަރުން ތިބީ ބޯޓުން ނުފައިބަ އެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ފަހުން ބުނެފައި ވަނީ ހާލަތު މިހާރު ކޮންޓްރޯލް ކުރެވިފައިވާ ކަމަށާއި، ފަސިންޖަރުން އެނބުރި ގައުމަށް ގެނައުމުގެ މަސައްކަތް ކުރަމުންދާ ކަމަށެވެ. މި ހާދިސާ ހިނގާފައި މިވަނީ އިޒްރޭލަށް ސަލާމަތީ ނުރައްކާތަކެއް ކުރިމަތިވެދާނެ ކަމަށް ނަތަންޔާހޫ އިންޒާރު ދީފައިވާ ދަނޑިވަޅެއްގަ އެވެ.

ފްލައިދުބާއީން ނެރުނު ބަޔާނެއްގައި، ބެން ގޫރިއަން އެއާޕޯޓަށް ދަތުރުކުރި FZ1073 ފްލައިޓަށް ހާދިސާއެއް ދިމާވެ ތަބޫކަށް ސަލާމަތްތެރިކަމާއެކު ޖައްސާފައިވާކަން ވަނީ ކަށަވަރުކޮށްދީފަ އެވެ. އަދި ކަމާބެހޭ އިދާރާތަކާ ގުޅިގެން މިކަން އިތުރަށް ތަހުގީގު ކުރަމުންދާ ކަމަށް ވެސް އެ އެއާލައިނުން ބުނެފައިވެ އެވެ.

ޕައިލެޓުންގެ މެދުގައި ހިނގާ މިފަދަ ހަމަނުޖެހުންތަކަކީ މަދުން ނޫނީ ނުހިނގާ ކަންކަމަށް ވީނަމަވެސް، މީގެ ކުރިން ވެސް މިފަދަ ހާދިސާތައް ހިނގާފައިވެ އެވެ. އެގޮތުން 2022 ވަނަ އަހަރު އެއާ ފްރާންސްގެ ދެ ޕައިލެޓަކު ކޮކްޕިޓް ތެރޭގައި ތަޅާފޮޅުމުގެ ސަބަބުން ވަނީ ވަޒީފާއިން ސަސްޕެންޑް ކޮށްފަ އެވެ.

އިޒްރޭލާއި ޔޫއޭއީއާ ދެމެދު ސިޔާސީ ގުޅުން ގާއިމުކުރުމަށްފަހު، ފްލައިދުބާއީ އަކީ އިޒްރޭލު ފަތުރުވެރިންގެ މެދުގައި ވަރަށް މަގުބޫލު އެއާލައިނެކެވެ.