Meehun gendhan Israel ge askaree boateh Saudi ah jassan hudhdha nudhee hifahattaifi

ދުބާއީން ފުރައިގެން އިޒްރޭލުގެ ތެލް އަވީވަށް ދަތުރުކުރަނިކޮށް، ކުއްލި ހާލަތުގައި ސައުދީ އަރަބިއްޔާއަށް ޖެއްސި މަތިންދާބޯޓުގައި ތިބި އިޒްރޭލުގެ ފަސިންޖަރުން ބަލައި ދިއުމަށް އެ ގައުމުގެ އަސްކަރީ މަތިންދާބޯޓަކަށް ސައުދީގެ ވައިގެ ސަރަހައްދަށް ވަނުމުގެ ހުއްދަ ދިނުމަށް ސައުދީ ސަރުކާރުން އިންކާރުކޮށްފި އެވެ.

ބުދަ ދުވަހު ހިނގި މި ހާދިސާގައި، ފްލައިދުބާއީގެ އެފްޒެޑް1073 ފްލައިޓް ސައުދީ އަރަބިއްޔާގެ ތަބޫކް އެއާޕޯޓަށް ކުއްލި ގޮތަކަށް ޖައްސަން މަޖުބޫރުވީ ބޯޓުގެ ކޯ-ޕައިލެޓް، ކެޕްޓަނަށް ހަމަލާދީ ބޯޓު ވައްޓާލަން އުޅުމާ ގުޅިގެންނެވެ. މި ކުރިމަތިލުމުގެ ތެރޭގައި ބޯޓު ދުއްވަން އިން އިންޑިއާގެ ކެޕްޓަން ކޮކްޕިޓް ހުޅުވައިލުމުން، ފަސިންޖަރުންގެ ބަޔަކު އެތެރެއަށް ވަދެ ހަމަލާދިން އޮމާންގެ ކޯ-ޕައިލެޓް ވަނީ ހިފަހައްޓައި ބޯޓުގެ ކޮންޓްރޯލް ހޯދައިފަ އެވެ. ގިނަ އަދަދެއްގެ އިޒްރޭލު މީހުން ދަތުރުކުރި މި ބޯޓު ރައްކާތެރިކަމާއެކު ތަބޫކް އެއާޕޯޓަށް ޖެއްސި ނަމަވެސް، މިއީ އެ މީހުންނަށް އަމާޒުކޮށް ބޯޓު ވައްޓާލަން ދިން ހަމަލާއެއް ކަމަށް އިޒްރޭލުން ވަނީ ސިފަކޮށްފަ އެވެ.

ބޯޓު ތަބޫކަށް ޖެއްސުމާއެކު، އޭގައި ތިބި އިޒްރޭލުގެ ފަސިންޖަރުން އެ ގައުމަށް ގެންދިއުމަށްޓަކައި އިޒްރޭލުގެ ވައިގެ ސިފައިންގެ "ސުޕަ ހާކިއުލިސް" މަރުކާގެ އަސްކަރީ ކާގޯ ބޯޓެއް ފޮނުވަން އިޒްރޭލުން ވަނީ މަސައްކަތް ކޮށްފަ އެވެ. ނަމަވެސް، ސައުދީ އަރަބިއްޔާ އާއި އިޒްރޭލާ ދެމެދު ރަސްމީ ސިޔާސީ އެއްވެސް ގުޅުމެއް ނޯންނާތީ، ސައުދީގެ ކަމާބެހޭ އިދާރާތަކުން ވަނީ އެ އަސްކަރީ ބޯޓު ސައުދީގެ ވައިގެ ސަރަހައްދަށް ވަނުމަށާއި އެ ގައުމަށް ޖެއްސުމަށް ހުއްދަ ދޭން ކަނޑައެޅިގެން ދެކޮޅު ހަދައިފަ އެވެ.

އިޒްރޭލުގެ އަސްކަރީ ބޯޓަށް ސައުދީން ހުއްދަ ނުދިން ނަމަވެސް، ފަސިންޖަރުން އެއާޕޯޓުގައި ތާށިވެފައެއް ނުވެ އެވެ. ފްލައިދުބާއީ އެއާލައިނުން ވަގުތުން ފޮނުވި ބަދަލު ފްލައިޓެއްގައި، އެ ހުރިހާ ފަސިންޖަރުން ވަނީ އެ ރޭގެ ވަގުތެއްގައި ތެލް އަވީވްގެ ބެން ގޫރިއަން އެއާޕޯޓަށް ރައްކާތެރިކަމާއެކު ގެންގޮސްދީފަ އެވެ.

މި ހާދިސާއާ ގުޅިގެން ކެޕްޓަނަށް ހަމަލާދިން ކޯ-ޕައިލެޓް މިހާރު ސައުދީ ފުލުހުންގެ ބެލުމުގެ ދަށަށް ގެންގޮސްފައިވާއިރު، މި މައްސަލަ ސައުދީގެ ކަމާބެހޭ ފަރާތްތަކުން އަންނަނީ ވަރަށް ސީރިއަސް މައްސަލައެއްގެ ގޮތުގައި ތަހުގީގު ކުރަމުންނެވެ.