ރާއްޖޭގައި މަސައްކަތް ކުރާ އިންޑިއާގެ ޑިޕްލޮމޭޓުންގެ ކަރާމަތަށް އަރައިގަންނަ މައްސަލަ ބަލަން ފަށައިފި އެވެ.

ރައްޔިތުންގެ މަޖިލީހުގެ ފޮރިން ރިލޭޝަންސް ކޮމިޓީގެ މުގައްރިރު، މަރަދޫ ދާއިރާގެ މެމްބަރު އިބްރާހިމް ޝަރީފް ކުރެއްވި ޓްވީޓެއްގައި ވިދާޅުވީ އިންޑިއާގެ ހައިކޮމިޝަނާ ދެކޮޅަށް ހަމަނުޖެހުން ހިންގަން ސޯޝަލް މީޑިއާގައި ގޮވާލަމުންދާ ގޮވާލުންތައް އެ ކޮމިޓީގެ މުގައްރިރުގެ ހައިސިއްޔަތުން އެންމެ ހަރުކަށި އިބާރާތުން ކުށްވެރިކުރާ ކަމަށެވެ.

ޝަރީފް ވިދާޅުވީ އެ މައްސަލަ ފުލުހުން ތަހުގީގު ކުރަމުން އަންނަ ކަމަށެވެ.

ފުލުހުން މިފަދަ މައްސަލައެއް ބަލަމުން އަންނައިރު، ދިޔަރެސް ނޫހާ މެދު ފިޔަވަޅު އަޅަން އިންޑިއާ އެމްބަސީން ދިވެހި ސަރުކާރުގައި ސިޓީއަކުން އެދިފައިވާ ކަމަށް އެ ނޫހުން ވަނީ ބުނެފަ އެވެ.

ދިޔަރެސް ނޫހުން ބުނެފައި ވަނީ އެ ސިޓީގައި އިންޑިއާ ހައިކޮމިޝަނުން ވަނީ އެ ހައިކޮމިޝަނާއި، ހައިކޮމިޝަނުގެ އިސްވެރިންނާއި މުވައްޒަފުންގެ އަބުރާއި ކަރާމާތަށް އުނިކަން އަންނަ ގޮތަށް ރާއްޖޭގެ ނޫސްތަކުގައި އާއި، ސޯޝަލް މީޑިއާގައި ޝުއޫރު ފާޅުކުރަމުންދާކަން މިނިސްޓްރީގެ ސަމާލުކަމަށް ގެންނަން ބޭނުންވާ ކަމަށް ރައީސް އޮފީހުގެ އިސް ބޭފުޅަކު އެ ނޫހަށް މައުލޫމާތު ދީފައިވާ ކަމަށެވެ. .އަދި މިއީ ވަރަށް ބޮޑަށް ރޭވިގެން، ޒާތީގޮތުން ދެމުންދާ "ހަމަލާ" ތަކެއްގެ ގޮތުގައި އިންޑިއާ ހައިކޮމިޝަނުން އެ ސިޓީގައި ސިފަކޮށްފައިވާ ކަމަށް ވެސް އެ ނޫހުން ބުންޏެވެ.