ބެންކޮކް (06 ޖުލައި) - ބެންކޮކްގެ ރަށްބޭރުގައި ހުންނަ ޕްލާސްޓިކް އުފައްދާ ފެކްޓްރީއެއްގައި މިދިޔަ ހޯމަ ދުވަހު ބާރުގަދަ ގޮވުމެއް ގޮވައި، ރޯވި އަލިފާންގަނޑު އަނެއްކާ ވެސް ބޮޑުވެ، ނުރައްކާ އިތުރުވެއްޖެ އެވެ.

އެ ފެކްޓްރީގައި އަލުން އަލިފާން ރޯވެފައި ވަނީ އެ ސަރަހައްދުގެ ދިފާއީ ބާރުތަކުން އަލިފާންގަނޑު ކޮންޓްރޯލް ކުރިތާ މަދު ވަގުތުކޮޅެއްގެ ތެރޭގައި އިއްޔެ މެންދުރުގެ ވަގުތެއްގަ އެވެ.

ހޯމަ ދުވަހު ގޮވި ބާރުގަދަ ގޮވުމުގައި އެކަކު މަރުވެފައިވާއިރު 33 މީހަކަށް ވަނީ އެކުވަރުގެ އަނިޔާ ލިބިފަ އެވެ. މި ހާދިސާގައި މަރުވެފައިވަނީ އަލިފާންގަނޑު ކޮންޓްރޯލްކުރަން މަސައްކަތް ކުރި ސިފައިންގެ މީހެކެވެ.

މިހާތަނަށް 1،600 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުކުރެވިފައި ވާއިރު، އެމީހުނަށް ވަނީ ބެންކޮކްގެ އެކި ހިސާބުތަކުން ވަގުތީ ހިޔާތައް ފޯރުކޮށްދީފަ އެވެ.

އިއްޔެގެ ފަތިހު އަލިފާންގަނޑު ކޮންޓްރޯލް ކުރެވިފައިވާ ކަމަށް ކަމާބެހޭ އިދާރާތަކުން ޔަގީންކޮށްދީފައި ވީނަމަވެސް މެންދުރުފަހުގެ ވަގުތެއްގައި އަނެއްކާ ވެސް ހުޅުގަނޑު ރޯވިކަމުގެ މައުލޫމާތު ވަނީ ލިބިފަ އެވެ.

މި ހާދިސާ ހިނގަން މެދުވެރިވި ސަބަބެއް އަދިވެސް ސާފުވެފައި ނުވާއިރު، ފެކްޓްރީގެ މެނޭޖަރު ބުނިގޮތުގައި ކުރިއަށް އޮތްތަނުގައި ވެސް އަލިފާން ރޯވުމަކީ އެކަށީގެންވާ ކަމެކެވެ. – ދަ ސްޓްރެއިޓްސް ޓައިމްސް