ބެންކޮކް (01 އޮގަސްޓް) - ތައިލެންޑްގެ ހޮސްޕިޓަލުތަކުގެ މޯޗަރީތައް ފުރި، މަރުވާ މީހުން ބައިތިއްބަން ފިނިކޮށްފައިވާ ކޮންޓެއިނަރުތައް ބޭނުންކުރަން ފަށައިފި އެވެ.

މިއީ 2004 ވަނަ އަހަރު ކުރިމަތިވި ސުނާމީ ކާރިސާއަށްފަހު އެ ގައުމުގައި މައްޔިތުން ބައިތިއްބުމަށް ކޮންޓެއިނަރު ބޭނުންކުރި ފުރަތަމަ ފަހަރެވެ.

ބެންކޮކްގެ ރަށްބޭރުގައިވާ ހޮސްޕިޓަލެއް ކަމަށްވާ ތައްމަސަޓް ޔުނިވާސިޓީ ހޮސްޕިޓަލުގެ މޯޗަރީއަކީ އެއްފަހަރާ ހަތް މީހުންގެ ހަށިގަނޑު ބޭއްވޭ ގޮތަށް ތައްޔާރު ކުރެވިފައިވާ މޯޗަރީ އެކެވެ.

ނަމަވެސް މިހާރު އެ ގައުމަށް ކުރިމަތިވެފައިވާ ކޮވިޑް 19ގެ އެންމެ ބޮޑު ރާޅުގައި ދުވާލަކު 10 މީހުން ބާއްވަން ޖެހޭ ކަމަށާއި އެވަރަށް މޯޗަރީގައި ޖާގަ ނެތުމުގެ ސަބަބުން 10،280 ޑޮލަރަށް ލިބޭ ދެ ކޮންޓެއިނަރު ގަނެފައިވާނެ ކަމަށް އެ ހޮސްޕިޓަލުގެ ޑިރެކްޓަރު ވަނީ ބުނެފަ އެވެ.

މި ކޮންޓެއިނަރުތަކުގައި ބޭއްވޭ ހަށިތަކަކީ މަރުގެ ސީދާ ސަބަބު ޔަގީންނުވާ ނަމަވެސް ކޮވިޑް 19އަށް ޕޮޒިޓިވްވެފައިވާ މީހުން ކަމަށް އޭނާ ބުންޏެވެ.

އިއްޔެ ތައިލެންޑްގައި ޖުމްލަ 18،912 މީހުން ކޮވިޑަށް ޕޮޒިޓިވްވެފައިވާއިރު، އެ ބަލީގައި 178 މީހުން ވަނީ މަރުވެފަ އެވެ.

ކޮވިޑްގެ މި ނުރައްކާތެރި ރާޅާއެކު ތައިލެންޑްގެ ހޮސްޕިޓަލުތައް ފުރި ސިއްހީ ދާއިރާއަށް އަންނަނީ ބާރުބޮޑުވަމުންނެވެ. -- ދަ ސްޓްރެއިޓްސް ޓައިމްސް