ބޮލީވުޑްގެ ކުރިއަރަމުން އަންނަ ބަތަލާ ނުޝްރަތު ބަރޫޗާގެ ފުރަތަމަ ބިރުވެރި ފިލްމު "ޗޯރީ" ނޮވެމްބަރު މަހުގެ ތެރޭގައި ރިލީޒް ކުރުމަށް ނިންމައިފި އެވެ.

ވިޝާލް ފޫރިއާ ޑައިރެކްޓްކުރި ބިރުވެރި މި ފިލްމު އަންނަ ނޮވެމްބަރު މަހުގެ ތެރޭގައި އެމެޒޯން ޕްރައިމް ވީޑިއޯއިން ޕްރީމިއާކުރާ ގޮތަށް ނިންމައި އޭގެ މޯޝަން ޕޯސްޓަރު ވެސް މިހާރު ވަނީ ދައްކާލާފަ އެވެ.

"ޗޯރީ"އަކީ 2017 ގައި ޑައިރެކްޓަރު ވިޝާލް ފޫރިއާ ގެނެސްދިން ކާމިޔާބު މަރާޓީ ފިލްމު "ލަޕަޗައްޕީ"ގެ ރީމޭކެކެވެ. "ޗޯރީ"ގެ ނަމުގައި އޭގެ ހިންދީ ރީމޭކް ގެނެސްދޭއިރު، ނުޝްރަތުގެ އިތުރުން މައިގަނޑު ރޯލުތަކުން މިތާ ވަޝިޝްތުއާއި ރާޖޭޝް ޖައިސްއާއި ސޯރަބް ގޯޔަލް ފެނިގެންދާނެ އެވެ.

https://www.instagram.com/p/CTyedQJDSh6/

މަގުބޫލުވި ފިލްމުތައް ކަމަށްވާ "ޕިޔާރު ކާ ޕަންޗްނާމާ" އާއި "ސޯނޫ ކޭ ޓިޓޫ ކީ ސްވީޓީ" ކުޅުނު ނުޝްރަތު ބުނެފައިވާ ގޮތުގައި "ޗޯރީ" އަކީ ބެލުންތެރިން ވަރަށް ހީނުކުރާ ކަހަލަ ރޯލަކުން އޭނާ ފެނިގެންދާނެ ފިލްމެކެވެ.

ނުޝްރަތު އެންމެ ފަހުން ފެނިފައިވަނީ މިއަހަރުގެ ކުރީކޮޅު ކަރަން ޖޯހަރްގެ ދަރުމާ ޕްރޮޑަކްޝަންސްއިން ގެނެސްދިން ނެޓްފްލިކްސްގެ އެންތޮލޮޖީ ފިލްމު "އަޖީބް ދާސްތާންސް"އިން އެވެ.

https://www.instagram.com/p/CTKHZdMtRsI/

"ޗޯރީ"ގެ އިތުރުން ނުޝްރަތުގެ ކުރިއަށް ހުރި ފިލްމުތަކުގެ ތެރޭގައި ސަނީ ކޯޝަލްއާއެކު ކުޅުނު "ހުޅްދަންގް" އާއި އަކްޝޭ ކުމާރާއި ޖެކްލިން ފެނާންޑޭޒްއާއެކު ކުޅޭ "ރާމް ސެތޫ" ހިމެނެ އެވެ.