ކްރިމިނަލް ކޯޓުގެ ފަނޑިޔާރު ހަސަން ސައީދުގެ އިތުރު މައްސަލައެއް ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލަން ފަށައިފި އެވެ.

ޖޭއެސްސީން ނެރެފައިވާ ބަޔާނެއްގައި ބުނެފައި ވަނީ ކްރިމިނަލް ކޯޓުގައި ބޭއްވުނު ބަންދު މުރާޖައާކުރުމުގެ އަޑުއެހުމެއްގައި ހަސަން ސައީދު އަމަލު ކުރައްވާފައިވަނީ ޖިނާއީ އިޖުރާއަތުގެ ގާނޫނާއި ޝަރީއަތް ކުރުމާ ބެހޭ ޖިނާއީ އިޖުރާއަތްތަކުގެ އުސޫލުތަކާ ހިލާފަށް ކަމަށް ބުނާ މައްސަލައެއް ތަހުގީގު ކުރުމަށް، އެކޮމިޝަންގެ "މައްސަލަ ބެލުމާމެދު ގޮތެއް ނިންމާ ކޮމިޓީ" ން ނިންމާފައިވާ ކަމަށެވެ.

އެހެންވެ މި މައްސަލަ ތަހުގީގުކުރުމަށް ކޮމިޓީ އެކުލަވާލާފައިވާ ކަމަށް ޖޭއެސްސީން ބުނެ އެވެ. އެހެން ނަމަވެސް އެއީ ކޮން މައްސަލައަކާ ގުޅިގެން އެކޮމިޝަނަށް ހުށަހެޅިފައިވާ ސުލޫކީ މައްސަލައެއްކަން ޖޭއެސްސީއިން ހާމަކޮށްފައިނުވެ އެވެ.

މައުލޫމާތު ލިބިފައިވާ ގޮތުގައި ހަސަން ސައީދުގެ މައްސަލަ ބަލަން ޖޭއެސްސީއިން ނިންމީ ހުޅުމާލޭގައި ފްލެޓް އިމާރާތް ކޮށްދޭނެ ކަމަށް ބުނެ އެތައް ބައެއްގެ އަތުން ގިނަ އަދަދެއްގެ ފައިސާ އަތުލި މައްސަލާގައި ހިޔާނާތުގެ އެތައް ދައުވާއެއް ލިބޭ އަހުމަދު މޫސާ (އައްމަޓީ) ކަފާލާތުގެ ދަށުން ދޫކޮށްލަން ނިންމުމުންނެވެ.

އޭނާއަކީ ޖިންސީ ކުށުގެ ސީރިއަސް ދައުވާތަކެއް އޮތް ކުރީގެ ޓޫރިޒަމް މިނިސްޓަރު އަލީ ވަހީދަށް މީހަކު ޖާމިނުކޮށް އޭނާ ރާއްޖޭން ބޭރަށް ދާން ވެސް ހުއްދަ ދެއްވީ ވެސް ހަސަން ސައީދެވެ. އަލީ ވަހީދު ދޫކޮށްލުމާ ގުޅޭގޮތުން ވެސް ގާޒީ ހަސަން ސައީދުގެ ސުލޫކީ މައްސަލައެއް ޖޭއެސްސީން ދަނީ ބަލަމުންނެވެ.