މާލޭގެ މަގުތަކުގައި ބާރު ސްޕީޑުގައި ސައިކަލު ދުއްވައި، ބިރުވެރިކަން އުފެދޭ ގޮތަށް އުޅުނު ބަޔަކު ރޭ ހުއްޓުވުމުން ފުލުހަކަށް ހަމަލާދީ ބިރު ދައްކައި އިންޒާރު ދިން މައްސަލައެއްގައި ތިން މީހަކު ހައްޔަރުކޮށްފި އެވެ.

ފުލުހުން މިރޭ ބުނީ މަގުމަތީ ޕެޓްރޯލްކުރަމުންދިޔަ ފުލުހަކަށް ނުކިޔަމަންތެރިވެ ބިރުދައްކައި ހަމަލާދީ މާރާމާރީ ހިންގި މައްސަލާގައި ހައްޔަރުކޮށްފައި ވަނީ މާލޭގެ ގްރޫޕަކަށް ނިސްބަތްވާ ތިން މީހުން ކަމަށެވެ.

ފުލުހުން ބުނީ އެ ހާދިސާ ހިނގާފައި ވަނީ އާންމުންގެ ހިތްތަކުގައި ބިރުވެރިކަން އުފެދޭގޮތަށް ނުރައްކާތެރިކޮށް ބާރު ސްޕީޑްގައި މަޖީދީމަގާއި ދިލްބަހާރުމަގު ގުޅުނު ހިސާބުގައި ދެ ސައިކަލެއްގައި ދުއްވަމުން ދަނިކޮށް އެ ސަރަހައްދުގެ ޓްރެފިކް ބެލެހެއްޓުމުގައި ހަރަކާތްތެރިވަމުން ދިޔަ ފުލުހަކު އެ މީހުން ހުއްޓުވަން މަސައްކަތް ކުރި ކަމަށެވެ. ނަމަވެސް ފުލުސް މީހާގެ އަމުރަށް ނުކިޔަމަންތެރިވެ، ވާޖިބަށް ހުރަސް އަޅައި އެ ފުލުސް މީހާއަށް ހަމަލާދީ މާރާމާރީ ހިންގައި ބިރުދައްކައި އިންޒާރުދީފައިވާ ކަމަށެވެ.

ފުލުހުންގެ ވާޖިބަށް ހުރަސްއަޅައި ހަމަލާ ދިން މައްސަލާގައި ހައްޔަރުކުރީ؛ މުހައްމަދު ވިއާމް، 27، ސ. ފޭދޫ، ވީނަސްވިލާ އާއި ހަސަން އަލީމް، 22، މާލެ، ދަފްތަރު 2841 އަދިޝާން އަބްދުﷲ، 20، އެވެ.

ފުލުހުން ބުނީ އެ މީހުންގެ ބަންދާމެދު ގޮތެއް ނިންމުމަށް މިއަދު ކޯޓަށް ހާޒިރު ކުރުމުން، ހަތް ދުވަހުގެ މުއްދަތަށް ކަސްޓޯޑިއަލް ޖަލެއްގައި ބަންދުގައި ބޭތިއްބުމަށް ކޯޓުން ވަނީ އަމުރުކޮށްފަ އެވެ. މި އެންމެންނަކީ ވެސް އެކި ކުށްކުށުގެ ރެކޯޑް އޮންނަ މީހުން ކަމަށް ވެސް ފުލުހުން ބުންޏެވެ.

މާލޭގެ މަގުތަކުގެ އަމާންކަން ގެއްލުވާލައި ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް ގްރޫޕް ހަދައިގެން މިފަދަ އަމަލުތައް ހިންގާ މީހުންނާމެދު ގާނޫނީ ހަރުކަށި ފިޔަވަޅު އަޅައި، މިފަދަ ކުށްތައް ހުއްޓުވުމަށް ގާނޫނީ ގޮތުން ކުރެވެންހުރި ހުރިހާ މަސައްކަތެއް ކުރަމުންދާނެ ކަމަށް ފުލުހުން ވަނީ ބުނެފަ އެވެ.