ކެޓްރީނާ ރާއްޖޭގެ ރީތިކަން ދައްކަނީ، އަބަދު ފޮޓޯތައް އިންސްޓަގްރާމަށް

ޗުއްޓީއަށް އެންމެ ފަހުން ރާއްޖެއައި އިންޑިއާގެ މަޝްހޫރު ފިލްމީތަރިންގެ ތެރޭގައި ކެޓްރީނާ ކައިފް ހިމެނެ އެވެ.

ރާއްޖޭގެ ގޮނޑުދޮށުގައި އޭނާގެ ފައި ޖައްސާލުމާއެކު އަންނަނީ، ރާއްޖޭގެ ރީތިކަން އޭނާގެ ސަޕޯޓަރުންނަށް ދެއްކުމަށް މެދުކެނޑުމެއް ނެތި ކޮންމެ ދުވަހަކު އެތައް ފޮޓޯއަކާއި ވީޑިއޯތައް ސޯޝަލް މީޑިއާއަށް ދޫކުރަމުންނެވެ. މި ފޮޓޯތައް އޭނާގެ އިންސްޓަގްރާމާއި ފޭސްބުކް ޕޭޖުން ވެސް ފެންނަން އެބަހުއްޓެވެ.

މިއީ ޗުއްޓީއަށް ކެޓްރީނާ ރާއްޖެއައި ދެވަނަ ފަހަރެވެ. އެންމެ ފަހުން އޭނާ ރާއްޖެ އައީ މިދިޔަ އަހަރުގެ ފަހުކޮޅު އެވެ.

ބ. އަތޮޅުގައި އޮންނަ މަތީ ފެންވަރުގެ ސޮނޭވާފުށީގައި ޗުއްޓީ ހޭދަކުރަމުން އަންނަ ކެޓްރީނާ މިދިޔަ ބުރާސްފަތި ދުވަހު ދައްކާލީ ހެނދުނު އޭނާ ފަތަން އުޅުނު މަންޒަރުތަކެވެ. ހުދުކުލައިގެ ސުވިމިން ސުއިޓަކާއެކު ތެމިފައިވާ އިސްތަށިގަނޑު ދައްކާލަމުން ލިޔެފައި ވަނީ "ސުވަރުގެ ފެނިއްޖެ" ކަމަށެވެ.

ކެޓްރީނާ ވަނީ އޭނާ ކަޅާއި ހުދުގެ މުސަޅަކާއެކު ހެނދުނު ސައިބުއި ގަޑީގައި ނެގި ފޮޓޯ އާއި ވީޑިއޯ ވެސް އިންސްޓަގްރާމަށް ދޫކޮށްފަ އެވެ. އެ މުސަޅަށް އޭނާ ދީފައިވާ ނަމަކީ "ޖެކް ކެޓީނާ" އެވެ.

ސޮނެވާފުށީގައި އޭނާ ހުންނަނީ ބީޗް ވިލާއެއްގަ އެވެ. އެތަނުން ގޮނޑުދޮށަށާއި ޕޫލަށް ނުކުމެވެން ހުންނަ ގޮތް ވެސް ދައްކާލާފައިވެ އެވެ.

މި ހަފުތާގެ ކުރީކޮޅު ވެސް ކެޓްރީނާ ވަނީ "ފޮޓޯ ޝޫޓެއް ރާއްޖޭގައި ނެގުމަކީ ވަރަށް އުފާވާ ކަމެއް" ކަމަށް ބުނެ ކުލަގަދަ ސުވިމިން ސޫޓަކާއެކު ގޮނޑުދޮށުގައި ނަގާފައިވާ ދެ ފޮޓޯއެއް ހިއްސާކޮށްފަ އެވެ.

ކެޓްރީނާ އެންމެ ފަހުން ފެނިފައި ވަނީ މިދިޔަ އަހަރު ނުކުތް "ބާރަތު" ކިޔާ ފިލްމެއްގައި ސަލްމާން ޚާނާއެކު އެވެ. ދެން އެންމެ އަވަހަށް އަންނާނެ ކަމަށް ބެލެވެނީ ރޯހިތު ޝެޓީގެ ސޫރިޔާވަންޝީ ގައި އަކްޝޭ ކުމާރާއެކު އެވެ. އެ ފިލްމް އަންނާނެ ކަމަށް ކުރިން ބުނެފައި އޮތީ އަންނަ އަހަރުގެ މާޗް މަހު އެވެ. ނަމަވެސް ކޮވިޑާ ހެދި އެ ފިލްމް ނެރުން ވަނީ މުއްދަތެއް ނެތް ގޮތަށް ލަސްކޮށްފަ އެވެ.