ކޮންމެ އަހަރެއްގެ ރޯދަމަހު މޯލްޑިވްސް މިއުޒިކް އެންޑް އާޓް ސެންޓަރުން ބާއްވާ "މަދަހަ ރަން އަޑު" މުބާރާތުގެ ޑިޖިޓަލް ޕާޓްނަރަކަށް ދިރާގު ހަމަޖައްސައިފި އެވެ.

ކުޑަކުދިންނަށް ހާއްސަ އެ މުބާރާތް އެންމެ ފުރަތަމަ ފެށީ 2020 ވަނަ އަހަރުގެ ރޯދަމަހު އެވެ. ކުޑަދުވަސްކޮޅެއްގެ ތެރޭގައި އެ މުބާރާތަށް ވަނީ ބޮޑު ތަރުހީބެއް ލިބިފަ އެވެ.

ދިރާގުން ބުނީ އެއީ ކުޑަކުދިންގެ ތެރެއިން ރީތިކޮށް މަދަހަ ކިޔާ ކުދިންނަށް އެ ފުރުސަތުދީ، އެ ކުދިންގެ ހުނަރު ކުރިއަރުވަން ބާއްވާ މުބާރާތެއް ކަމަށެވެ.

މި އަހަރުގެ މުބާރާތުގައި 90 ކުއްޖަކު ބައިވެރިވެފައިވާއިރު، އެ ޕްރޮގްރާމް ދައްކާނީ ރޯދަމަހުގެ ކޮންމެ ހޮނިހިރު، ހޯމަ އަދި ބުދަ ދުވަހެއްގެ ހަވީރު 4:15 އިން 4:45 އަށް ވީޓިވީންނެވެ. މުބާރާތުގެ އެޕިސޯޑުތައް ދިރާގު ޓީވީގެ ވީޑިއޯ އޮން ޑިމާންް ޕްލެޓްފޯމުން ވެސް ބެލޭނެ އެވެ.

ދިރާގުން ބުނީ ދީނާ ގުޅުން ހުރި ކަންކަން ޕްރޮމޯޓް ކުރުމުގައި އަބަދުވެސް އެ ކުންފުނިން އެހީތެރިވާނެ ކަމަށެވެ.