ބޮލީވުޑްގެ ފިލްމުތައް މިދުވަސް ކޮޅު އަންނަނީ ބޮއިކޮޓް ކުރުމަށް ގޮވާލާ ކެމްޕޭނެއް ހިންގަމުންނެވެ. މިކަމުގެ ސަބަބުން ބޮލީވުޑްގައި މަސައްކަތްކުރާ ގިނަ ފަންނާނުން ތިބީ ބޮޑު ޝޮކެއްގެ ތެރޭގަ އެވެ.

ކޮވިޑްގެ ބަލިމަޑު ކަމަށް ފަހު ސިނަމާތަކުގައި ފިލްމު އަޅުވަން ފަށާފައިވަނީ މިއަހަރުގެ ކުރީކޮޅުގަ އެވެ. ގިނަ ފިލްމުތަކެއް މިހާތަނަށް އަޅުވާފައިވާއިރު ހުރިހާ ފިލްމެއް ކަހަލަ ގޮތަށް ވަނީ ފްލޮޕް ފިލްމުތަކަށް ވެގެންގޮސްފަ އެވެ.

ބޮލީވުޑްގެ ފިލްމުތައް ބަލަން ސިނަމާ އަށް ނުދާން ގޮވާލާ އިންޓަނެޓުގައި ވާހަކަ ދައްކާތާ ދުވަސްކޮޅެއް ވެފައިވާއިރު މި ފަހުން ރިލީޒް ކުރި ބޮލީވުޑް ފިލްމުތައް ނާކާމިޔާބުވުމުގެ އެއް ސަބަބަކީ ވެސް އިންޓަނެޓުގައި ކުރިއަށް ގެންދާ ބޮއިކޮޓް ކެމްޕެއިންތަކެވެ.

އެގޮތުން އެންމެ ފަހު ސިނަމާގައި އެޅުވި މަޝްހޫރު ތަރިން ކަމަށްވާ އާމިރު ޚާނާއި ކަރީނާ ކަޕޫރުގެ ފިލްމު “ލާލް ސިންގް ޗައްދާ" ވެސް ވަނީ ފްލޮޕަކަށްވެގެން ގޮސްފަ އެވެ. އެކަމަކު އެ ފިލްމު ފްލޮޕްވީ އާމިރާއި ދެކޮޅަށް ކުރަމުންދާ އެންޓީ ކެމްޕެއިންތަކުގެ ސަބަބުން ސިނަމާތަކަށް އެ ފިލްމު ބަލަން ދާނެ މީހަކު ނުވެގެންނެވެ.

މި ފިލްމާއި މިދިޔަ ހަފްތާގައި ރިލީޒް ކުރި އަކްޝޭގެ “ރަކްޝާ ބަންދަން” އަޅުވަން ބުކް ކޮށްފައި ހުރި ތަންތަނުގެ ތެރެއިން 30 ޕަސެންޓު ސިނަމާތަކުން ވަނީ ބަލާނެ މީހަކު ނެތިގެން ކެންސަލް ކޮށްފަ އެވެ.

މިއަހަރު ކާމިޔާބު ލިބުނީ ހަމައެކަނި ކާތިކަށެވެ. އޭނާގެ ފިލްމު “ބޫލް ބުލައިޔާ 2” ބެލުންތެރިން ބަލައިގެންފަ ވާއިރު އެ ފިލްމުވަނީ ބޮޑު ހިޓަކަށްވެފަ އެވެ.

މި މައްސަލައިގަ މިއަހަރު ސިނަމާގައި ރިލީޒް ކުރަން ހަމަޖެހިފައި ހުރި ބޮލީވުޑް ފިލްމުތަކުގެ ކުރިމަގާއި މެދު ވަނީ ވަރަށް ބޮޑަށް ބަހުސް ކުރަން ފަށާފަ އެވެ. ދިރާސާ ކުރާ ފަރާތްތަކުން ބުނެފައިވަނީ ކުރިޔަށް ރިލީޒް ކުރަން ހަމަޖެހިފައިވާ ފިލްމުތަކަށް މިހެން ދިމާވުމަކީ ފުރުސަތު ބޮޑު ގޮތެކެވެ.

މިހާރުވެސް އަންނަނީ މިއަހަރު ކުރިއަށް ހުރި ބައެއް ފިލްމުތަށް ބޮއިކޮޓް ކުރުމަށް ގޮވާލާ ވަރުގަދަ ކެމްޕޭންތައް ކުރަމުންނެވެ. އެގޮތުން އާލިޔާ ބަޓް އާއި ރަންބީރު ކަޕޫރު އެކުގައި ފެންނާނެ ފުރަތަމަ ފިލްމު "ބުރަމަސްތުރަ" ބޮއިކޮޓް ކުރަން ގޮވާލާ އަޑު ގަދަވާން ވަނީ ފަށާފަ އެވެ. އެ ފިލްމު ރިލީޒް ކުރަން ހަމަޖެހިފައިވަނީ އަންނަ މަހު 9ގަ އެވެ.

ރިތިކް ރޯޝަނާއި ސައިފް ފެނިގެންދާ "ވިކްރަމް ވެދާ" ވެސް ވަނީ ބައިކޮޓްގެ ޝިކާރައަކަންވެފަ އެވެ. މީގެ އިތުރުން މަޝްހޫރު ތަރި ޝާހްރުކް ޚާންގެ ކުރިއަށް ފިލްމު "ޕަތާން" ވެސް ބޮއިކޮޓް ކުރުމަށް ގޮވާލާ ކެމްޕޭން ކުރަމުންނެވެ.

ފިލްމުތައް ބޮއިކޮޓްކުރަން ގޮވާތީ އަންނަ ހުކުރު ދުވަހު ރިލީޒްކުރާ "ދުބާރާ" ގެ ޑައިރެކްޓަރު އަނޫގާރާގް ކޭޝަޕް ވެސް އެކަމާ ކަންބޮޑުވުން ފާޅުކޮށްފައިވެ އެވެ. ބޮއިކޮޓްކުރަން ގޮވާ މީހުންނަށް އިޝާރާތްކޮށް އޭނާ މަޖާޒީކޮށް ބުނީ ބޮއިކޮޓްކުރަން ގޮވުމަކުން ފިލްމުތަކަށް ވާނެ ގެއްލުމެއް ނެތް ކަމަށާއި "ދުބާރާ" ވެސް ބޮއިކޮޓްކުރަން ގޮވަން އެދޭ ކަމަށާއި އޭރުން އެ ޓްރެންޑްގެ ސަބަބުން ފިލްމަށް ލިބޭ ސަމާލުކަން ބޮޑުވާނެ ކަމަށެވެ.

ބޮލީވުޑާ ދެކޮޅަށް މި ފަހުން އެންޓި-ކެމްޕޭންތަކެއް ފެށުނީ 2020 ގައި އެކްޓަރު ސުޝާންތު ސިންގް ރާޖްޕޫތު އަމިއްލަ އަށް ދަންޖެހިގެން މަރުވި ހާދިސާ އަށް ފަހު އެވެ. އެ މަރުގެ ތުހުމަތު ބޮލީވުޑްގައި އަޅުވައި، އިންޑަސްޓްރީ އާއި އޭގެ ނުފޫޒު ގަދަ ބައެއްގެ ބޮލުގައި އަސާސެއް ނެތް އެތައް ތުހުމަތުތަކެއް އަޅުވާފައިވެ އެވެ. މީގެ އިތުރުން ހިންދޫ ދީނާ ފިލްމުތަކުގައި މަލާމާތްކޮށްފައިވާ ކަމަށްބުނެ ބައެއް ފަރާތްތަކުން އަންނަނީ ފިލްމުތައް ބޮއިކޮޓް ކުރުމަށް ގޮވާލަމުންނެވެ.