މިދިޔަ އަހަރު ގދ. ތިނަދޫގެ ގެއެއްގެ ތެރޭގައި ހުރި މަސް ޓޭންކަކުން ކުޑަ ހަތަރު މަސް ވަގަށް ނެގި މީހަކު ހަތރު މަހާއި އަށް ދުވަހަށް ޖަލަށް ލާން ކްރިމިނަލް ކޯޓުން ހުކުމްކޮށްފި އެވެ.

ގދ. ތިނަދޫ ވަދޫރާގޭގެ މަސް ޓޭންކުން ޖުލައި 29، 2021 ގައި ކުރި ވައްކަމާ ގުޅިގެން ދައުލަތުން އޭނާގެ މައްޗަށް އުފުލީ ވައްކަންކުރުމުގެ ކުށުގެ ދައުވާ އެވެ.

މަސް ޓޭންކަކުން ވަގަށް ނަގާފައިވަނީ ތިން އިންޗި ހުންނަ ވަރުގެ ހަތަރު މަސް ކަމަށާއި އެއީ ދެ ކެމެޓް، އެއް ކާބާއި އެއް ގްރާމް ކަމަށް ދައުލަތުން ވަނީ ޝަރީއަތުގައި ސާފުކޮށްދީފަ އެވެ.

ދައުވާ އިއްވުމުން މައްސަލައިގެ އިބްތިދާއީ އަޑުއެހުމުގައި ދިފާއުން ކުށަށް އިއުތިރާފުވުމުން މައްސަލަ ޝަރީއަތުން ކުރިޔަށް ގެންދިޔައީ އަވަސް ނިޔާގެ ޝަރީއަތެއްގެ ގޮތުގަ އެވެ.

ކްރިމިނަލް ކޯޓުން ކޮށްފައިވާ ހުކުމްގައި ބުނެފައިވަނީ ދައުވާ ލިބުނު މީހާ އިއުތިރާފްވަނީ އެއްވެސް މަޖުބޫރުކަމެއް ނެތި ކަމަށާއި ވަކީލެއްގެ އެހީތެރިކަން ބޭނުން ނުވާ ކަމަށް ޝަރީއަތުގައި ބުނެފައިވާ ކަމަށެވެ.

ދައުވާ ލިބުނު މީހާ ވަނީ އަވަހަށް މައްސަލަ ނިންމައިދޭން އެދި ޖަލު ހުކުމް ޖޫރިމަނާއަކަށް ބަދަލުކޮށްދޭން އެދިފަ އެވެ. އެކަމަކު ދައުލަތުން ވަނީ އޭނާ އަކީ ޖޫރިމަނާ ދެއްކޭނެ ގާބިލްކަން ހުރި މީހެއްކަން ސާބިތުކޮށްދޭން އެދިފަ އެވެ. އަދި ޖޫރިމަނާ ދެއްކޭ ފަދަ މީހެއްކަން ސާބިތުކޮށްދެވޭ ނަމަ ޖަލު ހުކުމް ޖޫރިމަނާއަކަށް ބަދަލުކޮށްދިނުމުގައި އިއުތިރާޒެއް ނެތް ކަމަށް ދައުލަތުން ބުންޏެވެ.

ދައުލަތުން މިގޮތަށް އެދުމުން، ދައުވާ ލިބުނު މީހާ ވަނީ އޭނާ އަކީ "ވިލި އުފާ" ކިޔާ ތަނެއްގައި ވަޒީފާ އަދާކުރާ މީހެއް ކަމުގެ ލިޔުމެއް ޝަރީއަތަށް ހުށަހަޅައިފަ އެވެ. އެކަމަކު ހުކުމުގައި ބުނެފައިވަނީ އެ ލިޔުމާ ގުޅިގެން ބެލި ބެލުމުން، ދައުވާ ލިބޭ މީހާ އަކީ ޑްރަގް ކޯޓުގެ ހުކުމެއްގެ ދަށުން ގޭބަންދުގައި ހުންނަންޖެހޭ މީހެއްކަން އެނގޭ ކަމަށާއި އެހެންވެ އޭނާ އަކީ ޖޫރިމަނާ ދެއްކޭނެ ހާލަތެއްގައި ހުރި މީހެއް ނޫންކަން އެނގޭ ކަމަށެވެ.

އެހެންވެ، ވައްކަމުގެ ދައުވާ ސާބިތުވާ ކަމަށް ކަނޑައަޅައި ހަތަރު މަހާއި 24 ދުވަހަށް ޖަލަށް ލާން ހުކުމްކުރީ އެވެ. އެކަމަކު ތަހުގީގަށް 16 ދުވަހު ބަންދުގައި ހުރި މުއްދަތު އުނިކޮށް، ހުކުމުން ތަންފީޒުކުރަންޖެހޭ މުއްދަތަކީ ހަތަރު މަހާއި އަށް ދުވަސް ކަމަށް ހުކުމުގައިވެ އެވެ.