ކައިވެނީގެ ހުށައެޅުމަށް އިންކާރު ކުރުމުން މިސްރުގެ 19 އަހަރުގެ އަންހެނެއްގެ ގަޔަށް ބަޑިޖަހާ މަރާލައިފި އެވެ.

އުމުރުން 29 އަހަރުގެ އަހުމަދު ފަތީ އަމެއިރާ ވަނީ 19 އަހަރުގެ އަމާނީ އަބުދުލްކަރީމް އަލްޣައްޒާރުގެގ އާއިލާއަށް ކައިވެންޏަށް އެދި ހުށަައެޅުމެއް ފޮނުވާފަ އެވެ. ނަމަވެސް އަމާނީއާއި އޭނާގެ އާއިލާއިން ވަނީ މި ހުށައެޅުމަށް އިންކާރު ކޮށްފަ އެވެ.

މިކަމާ ރުޅި އައިސްގެން ފަތީ ވަނީ އަމާނީގެ އާއިލާ ކުރިމަތީގައި އޭނާގެ ގަޔަށް ބަޑި ޖެހުމަށްފަހު ފިލާފަ އެވެ. އަމާނީއަކީ މިސްރުގެ ތަންބިޝާ އަވަށުގެ ފެކަލްޓީ އޮފް ފިޒިކަލް އެޑިއުކޭޝަންގައި ތައުލީމް ހާސިލް ކުރަމުން އައި ދަރިވަރެކެވެ.

އަމާނީގެ އާއިލާއިން ބުނީ ފަތީގެ ހުށައެޅުމަށް އެމީހުން އިންކާރުކުރީ އެނާގެ އުޅުން ހުންނަ ގޮތުން އަމާނީ ފަދަ ބަސްއަހާ ރަނގަޅު ކުއްޖަކަށް ނުބައި އަސަރުތަކެއް ކުރާނެތީ ކަމަށެވެ.

ފަތީ އަމާނީއަށް ހަމަލާ ދިނުމާއެކު ހޮސްޕިޓަލަށް ގެންގޮސް ފަރުވާ ދޭން ފެށި ނަމަވެސް އޭނާ ސަލާމަތް ކުރަން ކުރި މަސައްކަތްތައް ވަނީ ނާކާމިޔާބުވެފަ އެވެ.

މި ހަމަލާގެ ފަހުން ނަގާފައިވާ ވީޑިއޯއެއް ސޯޝަލް މީޑިއާގައި ދައުރުވަމުން ދާއިރު ފަތީ ހޯދައި ހައްޔަރު ކުރުމުގެ އަމުރެއް ފުލުހުންގެ މައްޗަށް ވަނީ ނެރެފަ އެވެ.

މިސްރުގައި މިފަދަ ލޯބީގެ އަދި ކައިވެނީގެ މައްސަލަތަކުގައި އަންހެނުންނަށް ހަމަލާ ދިނުން ވަނީ މިފަހަކަށް އައިސް ވަރަށް ބޮޑަށް އިތުރުވެފަ އެވެ.