ފިލްމު އުފެއްދުމުގެ މަރުހަލާގައި "ޝާމިލުވާ" އެހެން މީހުންނަށް ވުރެ އެކްޓަރުންނަށް "މާ ބޮޑު ކްރެޑިޓެއް" ދެމުން އަންނާތީ މަޝްހޫރު ބަތަލާ ޕްރިޔަންކާ ޗޯޕްރާ ނުރުހުން ފާޅުކޮށްފި އެވެ.

ބޮލީވުޑާއި ހޮލީވުޑްގައި ކާމިޔާބު ފިލްމުތަކެއް ކުޅެފައިވާ ބަތަލާ ޕްރިޔަންކާ މިހެން ބުނެފައިވަނީ އިންޑިއާގައި އޭނާގެ އަމިއްލަ ހެއާ ކެއާ ބްރޭޑް ތައާރަފް ކުރުމަށް ބޭއްވި ހަފްލާއެއްގައި ވާހަކަ ދައްކަމުންނެވެ.

40 އަހަރުގެ ބަތަލާ ދިން އިންޓަވިއުއެއްގައި ބުނީ ހަގީގަތުގައި ފިލްމު ކުޅޭ މީހުން ނުވަތަ ފިލްމީ ތަރިންނަކީ އެހާ ހާއްސަ ބައެއް ވެސް ނޫން ކަމަށެވެ. އޭގެ ބަދަލުގައި ފިލްމީ މަސައްކަތުގެ ތެރެއިން ފިލްމު ކުޅޭ މީހުންނަށް ވުރެ މުހިއްމު ބޮޑެތ ިމަސައްކަތްތައް ކުރަނީ ކެމެރާގެ ފަހަތުގައި އެކި ޑިޕާޓްމަންޓްތަކުގައި މަސައްކަތްކުރާ މީހުން ކަމަށް ބުންޏެވެ.

“އަހަރެމެން އެކްޓަރުންނަށް މާ ބޮޑު ކްރެޑިޓެއް ދޭން، އެކްޓަރުން އެއްވެސް ކަމެއް ނުކުރޭ." ކުރީގެ ރީތީގެ ރާނީ ޕްރިޔަންކާ ބުންޏެވެ.

ޕްރިޔަންކާބުނީ އެކްޓަރުން ފިލްމްގައި ކިޔަނީ މީހަކު ލިޔެފައިވަ ސްކްރިޕްޓެއް ކަމަށާއި އެ މީހުން ލަވަކިޔަނީ މީހެއްގެ އަޑުދަށުން ކަމަށެވެ. އަދި ނަށަނީ މީހަކު ކިޔައިދޭ ގޮތަށް ކަމަށެވެ.

ފިލްމު މާކެޓްކުރާއިރު ވެސް މީހަކު ލިޔެފައިވާ ސުވާލުތަކެއް ނޫނީ އެކްޓަރު ނުކިޔާނެ ކަމަށާއި ހެދުން އަޅުވައި އިސްތށިގަނޑު ސްޓައިލްކޮށް މޭކަޕް ކޮށްދެނީ ވެސް އެހެން މީހުން ކަމަށް ވާތީ ޕްރިޔަންކާ ބުނީ އެކްޓަރުން ހަގީގަތުގައި "އެއްވެސް ކަމެއް ނުކުރޭ" ކަމަށެވެ.

ޕްރިޔަންކާ އެންމެފަހުން ފެނުނީ ކީނުރީވްސް އާ އެކީ ލީޑްރޯލް ކުޅެފައިވާ ފިލްމް ދަމެޓްރިކްސް ރިސަރަކްޝަނުންނެވެ. އޭނާގެ އަންނަން ހުރި ފިލްމްތަކުގެ ތެރޭގައި ހޮލީވުޑްގެ ސިޓަޑެލް، އަދި ބޮލިވުޑް ފިލްމް ޖީލޭ ޒަރާ ހިމެނެ އެވެ.