މާލޭގެ ފިހާރަޔަކުން ވައްކަން ކުރަނިކޮށް ހައްޔަރުކުރި މީހަކީ 47 ފަހަރު ހައްޔަރުކޮށް 31 ފަހަރު ބަންދުކޮށްފައިވާ މީހެއް ކަމަށް ކްރިމިނަލް ކޯޓުން ބުނެފި އެވެ.

ކްރިމިނަލް ކޯޓުން ބުނީ ކޮފީ ދަޅެއް ވަގަށް ނެގި މައްސަލައެއްގައި ހައްޔަރުކުރި މީހާގެ ބަންދާ މެދު ގޮތެއް ނިންމަން އިއްޔެ ކޯޓަށް ހާޒިރުކުރުމުންނެވެ.

ސ. ހުޅުދު އަށް ނިސްބަތްވާ އެ މީހާގެ ބަންދަށް ކްރިމިނަލް ކޯޓުން އިއްޔެ ވަނީ ފަސް ދުވަސް ޖަހައިފަ އެވެ.

ކޯޓުން ބުނި ގޮތުގައި އުމުރުން 47 އަހަރުގެ އެ މީހާ މިހާތަނަށް 47 އަހަރު ފަހަރަށް ހައްޔަރުކުރި އިރު، 31 ފަހަރަށް ބަންދުކޮށް، މުއްދަތު ޖަހާފައިވެ އެވެ.

މިފަހަރު އޭނާ ހައްޔަރުކޮށް ބަންދަށް މުއްދަތު ޖެހީ އެމްއެޗްއޭ މާޓް އިން ނެސްކެފޭ ބޮޑު ކޮފީ ދަޅެއް ވަގަށް ނެގިކަމުގެ ތުހުމަތުގަ އެވެ.

އޭނާ ހައްޔަރުކޮށް ބަންދުކޮށްފައިވާ މައްސަލަތަކުގެ ތެރޭގައި ގިނައިން ހުރީ މަސްތުވާތަކެއްޗާއި ވައްކަމުގެ މައްސަލަތަކުގައިކަން ކޯޓުން ވަނީ ފާހަގަ ކޮށްފަ އެވެ. އެ މީހާ މި އަހަރު ވެސް އެކި ފިހާރަތަކުން ވައްކަންކޮށްގެން ފަސް ފަހަރަށް ހައްޔަރުކުރި އެވެ.

ކުށްކުރާ މީހުން ތަކުރާރުކޮށް އެއް ކުށްތަކެއް ކުރަމުންދާއިރު އެ މީހުންނަށް އެކަށީގެންވާ އަދަބެއް ނުދެވި މައްސަލަތައް ދިގުލައިގެން ގޮސް އެމީހުން މުޖުތަމައަށް ދޫވާ މައްސަލައަކީ އާންމުންގެ ކަންބޮޑުވުން އަބަދުވެސް އޮންނަ މައްސަލައެކެވެ.