ރާއްޖޭގައި ހުންނަ އިންޑިއާގެ ހައިކޮމިޝަންގައި ހުޅުޖެހުމަށް ގޮވާލުމުގެ ތުހުމަތުގައި ހައްޔަރުކުރި އައްބާސް އާދިލް ރިޒާގެ ބަންދަށް އިތުރު 7 ދުވަސް ޖަހައިފި އެވެ.

އައްބާސްގެ ބަންދުގެ މުއްދަތު ހަމަވާތީ އޭނާގެ ބަންދާ މެދު ގޮތެއް ނިންމުމަށް މިދިޔަ ހުކުރު ދުވަހު ކޯޓަށް ހާޒިރުކުރުމުން ކްރިމިނަލް ކޯޓުން ވަނީ އޭނާގެ ބަންދަށް އިތުރު ހަތް ދުވަސް ޖަހާފަ އެވެ.

އައްބާސްގެ ބަންދަށް ކްރިމިނަލް ކޯޓުން އެންމެ ފުރަތަމަ ފަސް ދުވަސް ދިނީ އޭނާ ހައްޔަރުކުރި ދުވަހު އެވެ.

އައްބާސް މިދިޔަ މަހުގެ 25 ވަނަ ދުވަހު ހައްޔަރު ކުރީ އޭނާގެ ގޮވާލުމާ ގުޅިގެން އަޅަންޖެހޭ ފިޔަވަޅުތައް އަޅާނެ ކަމަށާއި ރާއްޖޭގައި ތިއްބަވާ ބޭރުގެ ޑިޕްލޮމެޓުންގެ ސަލާމަތާއި ރައްކާތެރިކަން ކަށަވަރުކޮށްދޭނެ ކަމަށް ސަރުކާރުން ބުނެފައި ވަނިކޮށެވެ.

އޭނާ ހައްޔަރުކުރީ ޗެނަލް 13 ގެ ޓީވީ ޝޯވ އެއް ނިންމާލާފައި ނުކުތް ވަގުތު އެވެ.