މިދިޔަ އަހަރުގެ ޖެނުއަރީ މަހާ އަޅާ ބަލާއިރު މިއަހަރުގެ ޖެނުއަރީ މަހު ސަރުކާރުން އާސަންދައަށް ކުރި ހަރަދު ހަތަރު ގުނަ އިތުރުވެފައިވަނީ ނިމުނު އެމްޑީޕީގެ ރިޔާސީ ޕްރައިމަރީގެ ސަބަބުންތޯ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ސުވާލު އުފައްދަވައިފި އެވެ.

ރައީސް ނަޝީދު މިފަދައިން ވިދާޅުވީ ނަފްސާނީ ދުޅަހެޔޮކަން ކަށަވަރުކުރުމަށް ނަފުސާނީ ބަލިތަކަށް ފަރުވާ ދިނުމަށް ހަރުދަނާ ނިޒާމެއް ޤާއިމުކުރުމަށް ގޮވައިލާ ރައްޔިތުންގެ މަޖިލީހުގެ ތިމަރަފުށީ ދާއިރާގެ މެންބަރު އަބްދުﷲ ރިޔާޒު ހުށަހެޅުއްވި ގަރާރުގެ ބަހުސްގެ ތެރެއިން ދެއްކެވި ވާހަކަފުޅެއްގަ އެވެ.

ރައީސް ނަޝީދު ވިދާޅުވީ ފާއިތުވި އަހަރުގެ ޖެނުއަރީ މަހާ އަޅާބަލާއިރު މި އަހަރުގެ ޖެނުއަރީ މަހުގައި އާސަންދައަށް ކުރި ހަރަދު ވަރަށް ބޮޑަށް އިތުރުވެފައިވާ ކަމަށެވެ.

"ސަރުކާރުގެ ވީކްލީ ފިސްކަލް ޑިވެލޮޕްމެންޓްސްގައި މިދިޔަ އަހަރު ޖެނުއަރީ މަހާއި މި އަހަރުގެ ޖެނުއަރީމަހާހުރި ތަފާތުގައި އާސަންދައަށް މިދިޔަ އަހަރުގެ ޖެނުއަރީ މަހުގައި 67.9 މިލިއަން ރުފިޔާ ޚަރަދުކުރި. މިއަހަރުގެ ޖަނަވަރީ މަހު 283.4 މިލިއަން ރުފިޔާ އާސަންދައަށް ޚަރަދުކުރެވިއްޖެ،" ނަޝީދު ވިދާޅުވި އެވެ.

ރައީސް ނަޝީދު ވިދާޅުވީ ސަރުކާރުގެ ހަރަދުތައް ހިނގާގޮތުގެ ތަފްސީލް ކޮންމެ ހަފުތާއަކުވެސް އާންމުކުރާއިރު، އެކަންކަމަކީ ރައްޔިތުންގެ މަޖިލީހުގައި ތިއްބަވާ މެމްބަރުން ބައްލަވައި ވިސްނަވަން ޖެހޭ ކަންކަން ކަމަށެވެ.