އިންޑިއާގެ މި އަހަރުގެ ރީތީގެ ރާނީގެ ތާޖު، ރާޖިސްތާނަށް ނިސްބަތްވާ އުމުރުން 19 އަހަރުގެ ނަންދިނީ ގުޕްތާ ހޯދައިފި އެވެ.

ފަންސާސް ނުވަ ވަނަ ފެމިނާ މިސް އިންޑިއާ މުބާރާތް ނަންދިނީ ކާމިޔާބުކުރިއިރު އޭނާއާ އެންމެ ގާތުން ދެން ވާދަކުރީ ދިއްލީގެ ޝްރެޔާ ޕޫޖާއާ އެވެ. އަދި ތިން ވަނަ ހާސިލުކޮށްފައިވަނީ މަނީޕޫރްގެ ތޯއޮނޯޖަމް ސްޓްރެލާ ލުވާންގް އެވެ.

ކޯޓާ ސިޓީއަށް އުފަން، ނަންދިނީ ވަނީ ބިޒްނަސް މެނޭޖްމަންޓުގެ ދާއިރާއިން ޑިގްރީ ހާސިލްކޮށްފަ އެވެ.

https://www.instagram.com/p/CrJOTlgJ4oX/

ނަންދިނީ މިސް އިންޑިއާގެ ޓައިޓްލް ހާސިލުކުރުމާ އެކު އޭނާ ވެގެން ދާނީ މި އަހަރު މިސް ވޯލްޑް ހޮވަން ބާއްވާ މުބާރާތުގައި އިންޑިއާ ތަމްސީލު ކުރާނެ މީހާއަށެވެ. މިސް ވޯލްޑް 71 ވަނަ އެޑިޝަން ބޭއްވުމަށް ނިންމާފައިވަނީ ޔުނައިޓެޑް އަރަބި އެމިރޭޓްސްގަ އެވެ.

https://www.instagram.com/p/CrE13TJt1Ln/

މީގެ ދެ ދުވަސް ކުރިން މަނިޕޫރްގައި ނިމިގެންދިޔަ ފެމިނާ މިސް އިންޑިއާގައި 30 ބައިވެރިން ވާދަކުރި އެވެ.

މި އަހަރުގެ މިސް އިންޑިއާ ހުށައަޅައި ދީފައި ވަނީ ބަތަލާ ބޫމީ ޕޭޑްނޭކަރް އާއި މަޝްހޫރު ހޯސްޓް މަނީޝް ޕޯލް އެވެ. ބޮލީވުޑްގެ ތަރިން ކަމަށްވާ ކަރްތިކް އާރްޔަން އަދި އަނަންޔާ ޕާންޑޭ ފަދަ ތަރިންގެ ފޯރި ގަދަ ހުށަހެޅުންތައް ވެސް މި ހަފްލާގައި ފެނިގެންދިޔަ އެވެ.

މީގެ ކުރިން އިންޑިއާގެ ބައެއް ތަރިން ވަނީ މިސް ވޯލްޑާއި މިސް ޔުނިވާސްގެ ތާޖު ވެސް އުފުލާލައިފަ އެވެ.