މާލޭގައި ހިިންގި ގޭންގު މާރާމާރީއެއްގައި މީހަކަށް ހަމަލާދީ، ޒަހަމްކޮށްލި ކަމުގެ ތުހުމަތުގައި ފުލުހުން ހޯދި އިބްރާހިމް ފައިހް ނިޒާމް، ހައްޔަރުކުރިޔަ ނުދިނުމަށް ފޮރުވައިގެން ގެންގުޅުނު ދެ މީހެއްގެ މައްޗަށް ދައުވާ ކޮށްފި އެވެ.

މިދިޔަ ޖެނުއަރީ މަހުގެ ތެރޭގައި ޖަނަވަރީ މަގު ކެފޭއެއްގެ ތެރޭގައި ތޫނުއެއްޗެއް ބޭނުންކޮށްގެން ހިންގި އެ މާރާމާރީއާ ގުޅިގެން ފައިހު ހޯދުމަށް ދޮޅުމަސް ފުލުހުން ހޭދަކުރަންޖެހުނެވެ. އޭނާ ހައްޔަރުކުރީ އަމިއްލައަށް ފުލުސް އޮފީހަށް ހާޒިރުކުރުމުންނެވެ.

ފައިހު ފޮރުވައިގެން އުޅުނު ކަމުގެ ތުހުމަތުގައި ދައުވާ އުފުލާފައި ވަނީ ލ. ގަން، ތުންޑި، ނެވަކޯން، އަބްދުﷲ ޖުނައިދު އާއި ރ. ކަނދޮޅުދޫ، ފީރޯޒުގެ، މުހައްމަދު ޝަބީބްގެ މައްޗަށެވެ.

އެ މީހުންގެ މައްޗަށް ކޮށްފައިވަނީ ކުށެއް ކޮށްފައިވާ މީހަކު ހައްޔަރުކުރިޔަ ނުދިނުމަށްޓަކައި، މީހާ ތަނެއްގައި ބެހެއްޓުމުގެ ކުށުގެ ދައުވާ އެވެ.

އެ މައްސަަލައާ ގުޅިގެން ފައިހުގެ މައްޗަށް އުފުލީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ ދަށުން، ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގުމުގެ ދައުވާ އާއި ގައިގައި އަތްލުމުގެ ދައުވާ އާއި ގާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްދުގައި ހުރަސްއެޅުމުގެ ދައުވާ އެވެ.

އޭގެ އިތުރުން ހަމަ އެ މަރާމާރީއާ ގުޅިގެން، ހ. ދިއްގާމާގޭ އަލީ ފާރިޒް އާއި މއ. އާދިއްޕަރު، މާއިން މުހައްމަދު އަޒީމްގެ މައްޗަށް، ގައިގާ އަތްލުމުގެ ކުށުގެ ދައުވާ ވަނީ އުފުލައިފަ އެވެ.