ރިޔާސީ އިންތިޚާބުގައި ރަށްވެހި ވެފައިވާ ރަށް ނޫން އެހެން ރަށެއްގައި ވޯޓުލާނަމަ އެ ރަށަކަށް ރީ-ރަޖިސްޓްރީ ކުރުމަށް އޮންލައިންކޮށް ހުޅުވާލި މުއްދަތުގެ ތެރޭގައި 22،800 އަށްވުރެ ގިނަ ފޯމު ހުށަހަޅާފައިވާކަމަށް އިލެކްޝަންސް ކޮމިޝަނުން ބުނެފިއެވެ.

އޮންލައިންކޮށް ރީ-ރެޖިސްޓްރީ ވުމަށް ހުޅުވާލި މުއްދަތު ރޭ 12:00އާ ހަމައަށް ވަނީ ހަމަވެފަ އެވެ. އިލެކްޝަންސް ކޮމިޝަނަށް ޖުމްލަ 22،882 ފޯމު ހުށަހަޅާފައިވާއިރު، އޭގެތެރެއިން ރަޖިސްޓްރީ ކޮށްފައި ވަނީ 18،088 ފޯމެވެ. އަދި އެކި ސަބަބުތަކާހުރެ 4،794 ފޯމެއް ވަނީ ރިޖެކްޓްކޮށްލާފަ އެވެ.

އިލެކްޝަންސް ކޮމިޝަނުން ބުނިގޮތުގައި ރިޖެކްޓްކުރި ފޯމުތަކުގެ ތެރޭގައި ހިމެނެނީ އައިޑީކާޑުގެ މުއްދަތު ހަމަވެފައިވަ ފޯމުތަކާއި، މާލެއަށް ނިމިދިޔަ އިންތިޚާބުގައިވެސް ވޯޓުލުމަށް ރަޖިސްޓްރީ ކޮށްފައިވާ މީހުންގެ ފޯމުތަކެވެ.

އޮންލައިންކޮށް ރީ-ރަޖިސްޓްރީވުމުގެ މުއްދަތު ހަމަވިނަމަވެސް އަންނަ ހޮނިހިރު ދުވަހާ ހަމައަށް ކަރުދާސް ފޯމުތައް މެދުވެރިކޮށް ރީ-ރަޖިސްޓްރީވުމަށް ހުށަހެޅޭނެ ކަމަށް އެ ކޮމިޝަނުން ބުންޏެވެ.

މިހާތަނަށް ރީ-ރަޖިސްޓްރީވުމަށް ޖުމްލަ 30،000 އަށްވުރެ ގިނަ ފޯމު އެ ކޮމިޝަނަށް ވަނީ ހުށަހަޅާފަ އެވެ.

މިހާތަނަށް ރާއްޖެއިން ބޭރުގެ ހަތަރު ގައުމެއްގައި ވޯޓު ފޮށި ބަހައްޓަން ވަނީ ނިންމާފަ އެވެ.

އަންނަ މަހުގެ ނުވަ ވަނަ ދުވަހު ބާއްވާ ރިޔާސީ އިންތިހާބުގައި ވާދަކުރައްވަނީ ރައީސް އިބްރާހީމް މުހައްމަދު ސޯލިހާއި ޕީއެންސީގެ ފަރާތުން ޑރ. މުހައްމަދު މުއިއްޒާއި ޑިމޮކްރެޓްގެ ފަރާތުން ހުޅުދޫ ދާއިރާގެ މެމްބަރު އިލްޔާސް ލަބީބާއި ޖުމްހޫރީ ޕާޓީގެ ލީޑަރު ގާސިމް އިބްރާހީމާއި އެމްއެންޕީގެ ރައީސް ކާނަލް މުހައްމަދު ނާޒިމްގެ އިތުރުން ކުރީގެ ހޯމް މިނިސްޓަރު އުމަރު ނަސީރެވެ.