ފަލަސްތީނާ އެކު ދިވެހިން ތިބިކަން ދައްކާލުމަށް އަންނަ ހުކުރު ދުވަހު މުޅި ރާއްޖޭގެ އެކި ކަންކޮޅުތަކުގައި ހަރަކާތްތަކެއް ކުރިއަށް ގެންދިޔމަށް ނިންމައިފި އެވެ.

"ފަލަސްތީނާ އެކު ދިވެހިން" ހަރަކާތް ކުރިއަށް ގެންދާ ފަރާތުން ބުނީ އަންނަ ހުކުރު ދުވަހު މާލޭގައި ހާއްސަ ސައިކަލު ބުރެއް ބޭއްވުމަށް ނިންމާފައިވާ ކަމަށެވެ. އެ ހަރަކާތް އޮންނާނީ އެ ދުވަހުގެ ހަވީރު 4 ޖަހާއިރު ރަސްފަންނު ސަރަހައްދުގަ އެވެ.

މާލޭގެ އިތުރުން އައްޑޫ ސިޓީ އާއި ފުވައްމުލަކު ސިޓީގައި ވެސް ހަމަ އެދުވަހު ހަރަކާތްތަކެއް ކުރިއަށް ގެންދާނެ އެވެ.

އެގޮތުން ފުވައްލަކު ސިޓީގައި އެ ދުވަހު ހަވީރު ސައިކަލު ބުރެއް ބޭއްވުމަށް ނިންމާފައިވާއިރު އައްޑޫ ސިޓީގައި ހުކުރު ދުވަހު ފަލަސްތީން މިނިވަން ކުރުމަށް ގޮވާލާ ހާއްސަ ރެލީއެއް ބޭއްވުމަށް ވަނީ ނިންމައިފަ އެވެ.

ރާއްޖޭގެ ރައްޔިތުންނަކީ އަބަދުވެސް ފަލަސްތީނުގެ ހައްގުގައި ވަކާލާތުކުރާ ބަޔެކެވެ. އެ ގައުމަށް އެހީވުމަށް އެކި ފަންޑުތަކާއި ފައިސާ އެއްކުރުމުގެ ގިނަ ހަރާތްތަކެއް އަބަދުވެސް ދިވެހިން ހިންގަ އެވެ. އަދި ފަލަސްތީނުގެ މިނިވަންކަމަށް ގޮވާލާ ހަރަކާތްތައް ވެސް ބާއްވަ އެވެ.

މމިދިޔަ ހޮނިހިރު ދުވަހުން ފެށިގެން ފަލަސްތީނުގެ މުޖާހިދުން ދަނީ އިސްރާއީލަށް މެދުކެނޑުމެއް ނެތި ވަރުގަދަ ހަމަލާތަކެއް ދެމުންނެވެ. ރައްދުގައި އިސްރާއީލުން ދަނީ ފަލަސްތީނުގެ ޣައްޒާ އަށް ބޮން އަޅައި ގިނަ ބަޔަކު ޝަހީދު ކުރަމުންނެވެ. އޭގެ ތެރޭގައި ގިނަ އަދަދެއްގެ ކުޑަކުދިންނާއި އަންހެނުން ވެސް ހިމެނެ އެވެ.

މިހާތަނަށް ފަލަސްތީނުގެ 900 އަށް ވުރެ ގިނަ މީހުން ޝަހީދުކޮށްލާފައިވެ އެވެ. އިސްރާއީލަށް ދިން ހަމަލާތަކުގައި 1،200 މީހުން ވަނީ މަރާލައިފަ އެވެ.