އިސްރާއީލްގެ އަސްކަރިއްޔާ އިން ފަލަސްތީނުގެ ރައްޔިތުންނަށް މެދުކެނޑުމެއް ނެތި ދެމުން އަންނަ ހަމަލާތަކާ ގުޅިގެން ފަލަސްތީނުގެ ރައްޔިތުންނަށް އެހީވާން ފައިސާ ހޯދަން ރާއްޖޭގެ ހުރިހާ މީޑިއާތަކުން ގުޅިގެން ޓެލެތޯންއެއް ބާއްވަން ނިންމައިފި އެވެ.

އިންޓަނޭޝަނަލް އެއިޑް ކެމްޕޭން (އައިއޭސީ) އިން މިއަދު ބޭއްވި ނޫސްވެރިންގެ ބައްދަލުވުމުގައި އެ ޖަމިއްޔާގެ ވައިސް ޗެއާމަން އާދަމް ނާއިފް ވިދާޅުވީ ޣައްޒާގައި ތިބި ފަލަސްތީން ރައްޔިތުންނަށް އެހީވުމަށް ވަރަށް ގިނަ ކަންކަން ރާވާފައިވާ ކަމަށެވެ. އޭގެ ތެރެއިން އެއް ކަމަކީ މީޑިއާތަކާ ގުޅިގެން ބާއްވާ ޓެލެތޯން ކަމަށާއި މި ޓެލެތޯން އަންނަ ހުކުރު ދުވަހުގެ މެންދުރު ފަހުން ފެށިގެން އަންގާރަ ދުވަހާ ހަމައަށް ކުރިއަށް ގެންދާނެ ކަމަށް ނާއިފް ވިދާޅުވި އެވެ.

ޓެލެތޯންގެ އިތުރުން ފަލަސްތީން ރައްޔިތުންނަށް އެހީވުމުގެ ގޮތުން މާލޭ ސަރަހައްދުގެ ހުރިހާ މިސްކިތްތަކެއްގެ ބޭރުގައި ފަންޑު ފޮށި ބަހައްޓަން ނިންމާފައިވާ ކަމަށް އޭނާ ވިދާޅުވި އެވެ. އަދި ރަށްރަށުގެ މިސްކިތްތަކުގައި ވެސް އެ ރަށްރަށުން އިސްނަގައިގެން ފަންޑު ފޮށި ބަހައްޓަން އޭނާ އެދިވަޑައިގެންނެވި އެވެ.

ފަލަސްތީން ރައްޔިތުންނާ އެކުގައި ތިބި ކަން ހާމަކުރުމުގެ ގޮތުން ހުކުރު ދުވަހު މާލެ އާއި ބައެއް ރަށްރަށާއި ސިޓީތަކުގައި އެއްވުންތައް ވަނީ ބާއްވަން ނިންމައިފަ އެވެ.

އަނިޔާވެރި ޔަހޫދީން ފަލަސްތީނަށް ދެމުންދާ ހަމަލާތަކާ ގުޅިގެން ބަދަލު ހިފުމެއްގެ ގޮތުން ފަލަސްތީނުގެ ހަމާސް ހަނގުރާމަވެރިން ހޮނިހިރު ދުވަހުގެ ހެނދުނުގެ ވަގުތެއްގައި ދިން ކުއްލި ހަމަލާތަކުގެ ސަބަބުން އިސްރާއީލްގެ 1،200 މީހުން މަރާލައި، 100 އަށް ވުރެ ގިނަ މީހުން ރަހީނުކޮށްފައިވާ ކަމަށް އިސްރާއީލުން ބުނެ އެވެ.

ފަލަސްތީނުގެ ރައްޔިތުންގެ ހައްގުގައި ހަނގުރާމަކުރަމުންދާ ހަމާސް ޖަމާއަތުން ހާމަކުރާގޮތުގައި މި ހަނގުރާމަ ފެށުމަށް މަޖުބޫރުވީ އިސްރާއިލުގެ ޔަހޫދީ ދައުލަތުން ފަލަސްތީނުގެ ބިންތަކަށް ވެރިވެ، އަލް އަގްސާ މިސްކިތުގެ ހުރުމަތް ކަނޑާލައި ފަލަސްތީނުގެ މުސްލިމުންނަށް ނުހައްގުން ދެމުންދާ އަނިޔާތަކުގެ ސަބަބުން ކަމުގައި އެ ޖަމާއަތުން ވަނީ ހާމަކޮށްފަ އެވެ.

ދެ ގައުމުގެ ދެމެދުގައި ބަދަލުކުރެވެމުންދާ ހަމަލާތަކުގެ ސަބަބުން މިހާތަނަށް ވަނީ ފަލަސްތީނުގެ 1،000 އަށް ވުރެ ގިނަ މީހުން ޝަހީދުކޮށްލައިފަ އެވެ.