ފަލަސްތީނުގެ ޣައްޒާގައި ހުންނަ އިންޓަނޭޝަނަލް އެއިޑް ކެމްޕެއިން (އައިއޭސީ) ގެ ގުދަނަކަށް އިސްރާއީލުން ހަމަލާދީ ހަލާކުކޮށްލި ނަމަވެސް އެ ޖަމިއްޔާ އިން ކުރަމުން އަންނަ މަސައްކަތަށް ހުއްޓުމެއް ނާންނާނެ ކަމަށް އައިއޭސީން ބުނެފި އެވެ.

އައިއޭސީގެ އޮފިޝަލަކު މިރޭ ވިދާޅުވީ އައިއޭސީގެ ފަރާތުން ޣައްޒާ ރައްޔިތުންނަށް ފޯރުކޮށްދިނުމަށް އެ ސަރަހައްދަށް ގެންގޮސް ހުރީ ވަރަށް މަދު ކާބޯތަކެތި ކަމަށެވެ. އެ ރައްޔިތުންނަށް ފޯރުކޮށްދިނުމަށް ހުރި މައި އެއްޗެހި ސަލާމަތުން ހުރި ކަމަށް އޭނާ ވިދާޅުވި އެވެ.

ޣައްޒާގެ ރައްޔިތުންނަށް ކާބޯތަކެތި ފޯރުކޮށްދޭން ކުރިއަށް ވުރެ ބޮޑަށް ހިތްވަރުކޮށް މަސައްކަތް ކުރައްވާނެ ކަމަށް ވެސް އޭނާ ވިދާޅުވި އެވެ.ޣައްޒާގައި ހުންނަ އައިއޭސީގެ ގުދަނަކަށް ޔަހޫދީން ދިން ހަމަލާއާ ގުޅިގެން ގުދަނަށާއި އެތަނުގައި ހުރި އެއްޗިއްސަށް ވެސް ގެއްލުންތަކެއް ލިބިފައިވެ އެވެ.

"އެއްވެސް މީހެއްގެ ފުރާނަޔަށް ގެއްލުން ވާވަރުގެ އަނިޔާއެއް ނުވޭ." އައިއޭސީން އެކްސްގައި ކުރި ޕޯސްޓެއްގައި ބުނެފައިވެ އެވެ.

ގުދަނުގައި ހުރި ތަކެތީގެ ތެރޭގައި 2،000 ރަޖާ އާއި ވަގުތުން ކެވޭ ގޮތަށް ތައްޔާރު ކުރެވިފައިވާ 1،000 ޕެކްގެ އިތުރުން، އަންނައުނު 3،000 ޕެކް ހިމެނޭ ކަމަށް އައިއޭސީން ބުނެފައިވެ އެވެ. އަދި އެ ޖަމިއްޔާގެ މުވައްޒަފުން ދަތުރު ކުރަމުންދިޔަ ވެހިކަލަކަށް ހަމަލާދީފައިވާ ކަމަށް ވެސް އައިއޭސީން ބުނެފައިވެ އެވެ.

ޣައްޒާގެ ހެލްތް މިނިސްޓްރީގެ އެންމެ ފަހުގެ ތަފާސް ހިސާބުތަކަށް ބަލާއިރު އިސްރާއީލުގެ ހަމަލާތަކުގައި ޣައްޒާއިން ޝަހީދުވީ މީހުންގެ އަދަދު ވަނީ 3000 އަށް އަރާފައެވެ. އަދި ޒަހަމްވީ މީހުންގެ އަދަދު ވަނީ 12،500 އަށް އަރާފައެވެ.