ފަލަސްތީނުގެ ޣައްޒާ ރައްޔިތުންނަށް އެހީ ލިބޭނެ ގޮތެއް މަގުފަހި ކުރަން ރައީސް އިބްރާހިމް މުހައްމަދު ސޯލިހް މިއަދު ގޮވާލައްވައިފި އެވެ.

ޣައްޒާގައި ހުންނަ އަލް އަހްލީ އަރަބް ހޮސްޕިޓަލަށް އަމާޒުކޮށް އިސްރާއީލުން ހަމަލާ ދިނުމާ ގުޅިގެން އެކަން ހަރުކަށި އިބާރާތުން ކުށްވެރި ކުރައްވައި ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ ހޮސްޕިޓަލް ފަދަ ތަންތަނަށް ހަމަލާ ދިނުމަކީ ބައިނަލްއަގުވާމީ ގާނޫނުތައް މަނާ ކުރާ ކަމެއް ކަމަށެވެ.

އެހެންކަމުން، އިސްރާއީލާއި ފަލަސްތީނުގެ ހަމާސް ޖަމާއަތާ ދެމެދު ކުރިއަށްދާ ހަނގުރާމަ ހުއްޓުވަން ދުނިޔޭގެ ގައުމުތަކުންނާއި ޖަމާއަތްތަކުން މަސައްކަތްކޮށް، ޣައްޒާ ރައްޔިތުންނަށް އެހީ ލިބޭނެ ގޮތެއް މަގުފަހި ކުރަން ވެސް ރައީސްގެ ޕޯސްޓްގައި ގޮވާލެއްވި އެވެ.

އިސްރާއީލުން މި ފަހުން އެންމެ ނުރައްކާތެރި ހަމަލާއެއް ދީފައި ވަނީ ޣައްޒާގައި ހުންނަ އަލް އަހްލީ އަރަބް ހޮސްޕިޓަލަށެވެ. މި ހޮސްޕިޓަލަށް ބޮން އަޅައި، އެ ހޮސްޕިޓަލްގެ ގޯތިތެރޭގައި ތިބި އެތައް ސަތޭކަ ބަޔަކު ޝަހީދުކޮށްލައި، އެތައް ބަޔަކު ވަނީ ޒަހަމްކޮށްލައިފަ އެވެ.

ހޮސްޕިޓަލަށް އަމާޒުކޮށް އިސްރާއީލުން ދިން ހަމަލާތަކުގައި މިހާތަނަށް 500 އަށް ވުރެ ގިނަ މީހުން ޝަހީދުވެފައިވާ އިރު، އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.

އިސްރާއީލްގެ ހަމަލާތަކުގައި ފަލަސްތީނުގެ ޣައްޒާ އިން 3،500 އަށް ވުރެ ގިނަ މީހުން ވަނީ ޝަހީދުވެފަ އެވެ. އަދި މި ހަމަލާތަކުގައި 12،000 އަށް ވުރެ ގިނަ މީހުންނަށް އެކިވަރުގެ ޒަހަމްތަައް ލިބިފައިވެ އެވެ. ހަމާސްގެ ހަމަލާތަކުގައި އިސްރާއީލުން 1،400 މީހުން ވަނީ މަރާލައިފަ އެވެ.